Hey Brother做Rock友　西貢拍MV餵蚊

由李思捷、黃智賢、麥長青、曹永廉及唐文龍組成的中年男團Hey Brother，繼年初成團時首推歌曲《我為人人》後，最近將迎來第二首作品《共唱輝煌》。今次歌曲宣揚正能量及提到「尋找初心」，為拍攝MV，5子在日出時份到西貢外景，期間不僅熱到汗流浹背，更慘被蚊狂叮。

對於「尋找初心」，他們均指Hey Brother的組成為大家尋回不少入行初心，黃智賢感觸說：「入行由青少年大使開始，然後拍兒童節目，嗰段時間除咗參與幕前演出，亦會代表公司去參加社區活動，感覺到自己係新人，都做緊有意義工作，但隨住時代變遷漸漸淡忘咗初心，直到最近Hey Brother成立，大家不謀而合要出歌發放正能量，重新感受當年做一粒小螺絲嘅價值。」曹永廉則憶述初入行很喜歡唱歌：「但之後轉型拍劇，依家又重回唱歌懷抱，已經搵番初心，希望憑歌曲帶畀大家共鳴。」

MV拍攝期間，為了捕捉旭日初升的畫面，5子凌晨時分便要出發，麥長青感嘆很久試過「03」通告，今次拍MV的場地亦滿載他多年前在TVB拍古裝劇的回憶：「呢度係以前拍古裝劇成日嚟，以前啲路都未整好，我哋要着古裝行半個鐘，夏天真係一身汗，唔知道後生時點解咁捱得，依家要我行，真係頂唔順。今次好開心可以幾位兄弟一齊開工，大家都冇帶櫈，企足一朝早，曬到皮膚變黑！」

唐文龍透露今次MV拍攝經歷天氣變化，喻意黑暗過去會迎來美好將來：「上次MV喺室內拍攝，今次拍攝出發啱啱落緊雨，但抵達現場後雲霧散去，天朗氣清，就似意味遇到困境毋須意志消沉，柳暗花明又一村。」在場所有人都忍住蚊叮蟲咬及猛烈陽光，幸而拍攝倘算順利。

此外，他們正籌備第3首歌，曲風較活潑貼地，主題為「男人之苦」。李思捷透露這首新歌更很Rock，想不到5位「叔叔」竟有新突破。問到會否嘗試不同類型的表演，他坦言：「我哋5個想一齊拍戲，因為大家喺演戲上都有豐富經驗，相信出嚟效果會更成熟。相比年輕時，我哋依家人生經驗多咗，希望透過作品令觀眾笑一笑。」

東網網站 : https://on.cc/東網Facebook專頁 : https://www.facebook.com/onccnews/