越南峴港機場　港女失控痛罵男友「叫雞」兼家暴　機艙混戰推跌空姐　航班延誤35分鐘　雙雙被請落機

越南峴港返港航班昨晚（2日）爆發激烈情侶衝突，一對港人情侶先在候機室爭執，再將混亂帶上機，女方當眾怒指男方「叫雞」、又稱遭家暴「打咗我40拳，醫院有紀錄」，其間情緒失控一度推跌空姐，導致航班延誤約35分鐘才起飛，最終二人被機組人員請離機。

由網民tommytcwtang上載的影片顯示，事發於峴港機場候機區。影片開始時男子當時坐著，女子則站在其身前，男子大聲質疑女友出軌，女方即激動地高聲反擊，向圍觀者指男友召妓「佢叫雞呀！佢叫雞呀！我有見到佢叫雞呀！」男子一度試圖起身，卻被女方按著。此時女子再高呼「佢有叫雞呀！你鍾意影就影啦！佢鍾意影就影啦！」女子接著指控曾遭男方家暴，「佢打我40拳呀！港怡醫院有紀錄……佢打我40拳，醫院有紀錄㗎！」

事件延伸至機艙內，據拍片者指，二人原被安排分開坐，惟女方堅持要與男友同坐未果，情緒再度爆發。畫面可見，女子激動掙扎，兩名空姐上前阻止，其中一名更被推跌，旁邊乘客驚呼。

空姐從後抱住她，高聲安撫：「冷靜啲呀，小姐。」女子則邊哭邊喊：「我要同佢坐！佢做錯嘢！我要同佢一齊坐！係佢做錯嘢喎！」隨後更情緒激昂質問：「係咪全香港人都唔幫我呀！」

見女子依然失控，空姐表示：「唔好意思呀，你要落機啦。」女子一度轉為冷靜反問：「咁我唔落啦，依家冷靜，係咪畀我坐呀？」惟空姐堅定回應：「唔係囉，對唔住呀！我控制唔到你！Sorry！」女子再度爆喊大叫「唔落機」，並衝向男友，空姐連忙拉住她：「冷靜！冷靜！」

女子啜泣道：「依家想我點呀……係咪全香港人都唔幫我呀！依家係佢做錯事！」又再質問：「依家做錯事係佢喎！你係咪唔企我果邊呀！」空姐苦勸：「我幫你！一齊去前面，一齊返屋企先，好唔好？」女子情緒稍緩，空姐再柔聲道：「乖！男人係咁㗎啦，我哋過去……」

此時男方突然插嘴，高聲反擊：「你聽佢講？我有，我X街死呀！佢精神病㗎！」空姐急忙示意他收聲，女子聞言再度大哭：「你講咩呀！」空姐繼續調停：「我哋明㗎，我哋去前面，一人讓一步好唔好！我哋返香港先啦！依度點鬧都無用。」
涉事航班原定晚上7時25分起飛，因事件延誤約35分鐘。大量網民留言：「辛苦晒空姐同機組」、「處理得好專業」，亦有人直言「情侶鬧交唔好累街坊」。
根據第494章《航空保安條例》第12B條，乘客如在機上妨礙機組人員或擾亂秩序，危及機上紀律，可構成刑事罪行。

影片截圖來源：Threads@tommytcwtang

港新聞Instagram：https://www.instagram.com/kong.news/
港新聞Threads : https://www.threads.net/@kong.news