阿嬌收天上星星做禮物冧到爆　要氹女神話咁易！

藝人鍾欣潼（阿嬌）於內地真人戀愛節目《怦然心動20歲》大談愛情觀，亦分享唔少不為人知嘅經歷，最新一集，講到有冇人試過曾自己做過特別用心嘅事，阿嬌自爆：「我收過星星，天上面的星星。有一封信有一個坐標，那個名字是你的名字。」阿嬌一開口就令在場嘉賓大感驚訝！

其實佢收過嘅係以自己名字命名嘅星星作禮物，呢個「星星命名」其實係一種服務，內地及外國網站早年開始流行，付費109人民幣（約131港元）至1200人民幣（約1440港元）不等，就可替一顆星星命名，並會收到一份星星禮物包，內有所付錢嘅星星坐標、星星姓名及證明書，聲稱保證唔會再被冠另一個名。不過，有天文學者踢爆，星星命名權係由國際天文學聯合會負責管理，並非一般人可以擁有，所謂嘅證書根本冇認受性，其實只係一場「星星騙局」。

節目中阿嬌冇透露「星星」係咪前夫賴弘國送抑或粉絲送，唔理有冇認受性，呢份禮物對佢嚟講，絕對比起名牌包包更有心思、紀念價值！

東網網站 : https://on.cc/

東網Facebook專頁 : https://www.facebook.com/onccnews/