舞台劇《利瑪竇》添食！王梓軒忙完演唱會即黐鬚埋班

去年4月，劉松仁籌備多年的音樂舞台劇《利瑪竇》叫好叫座！明天舉行part 2更加開8場，身為男主角的王梓軒剛完成十週年演唱會，雖然兩個大project輪住做，不過梓軒同女主角陳潔儀默契十足，一拍即合！

今次《利瑪竇》添食，內容改了不少，對梓軒來說亦有一定難度，梓軒話：「今次有啲壓力嘅，因為排《利瑪竇》係同我之前個十週年演唱會疊住，相對我就少咗好多排練時間，但大家都會expect好大嘅進步，因為係重演，上次係學習，今次會有一個更好嘅演繹，幸好成個team都充滿正能量，的確我同陳潔儀及其他對手嘅默契都好咗好多，期待今次能夠帶俾觀眾一啲正面嘅信息同愛……」

梓軒透露今次更換了三成卡士：「本身個卡士有成50人，換咗咁多人，其實好多嘢都要重新排過，上次係首演，好多都係僅僅夠時間搞掂……雖然故事大綱冇改，但係長度、對手嘅關係都有幾大改動，我覺得有進步係好，都好感激成個團隊嘅努力。（記對白有冇難度呢？）上次演過一次，嗰啲好難明嘅古文、外語、拉丁文，之前做咗功課，冇咁難拿捏，反而今次長篇嘅獨白，我又搵到啲新嘅演繹，一來熟咗，二來自己又多咗感受，所以難處唔一樣，唔係在於背誦，而係發掘生活有關嘅事情，希望今次可以貼近觀眾多啲。」

2020年的《利瑪竇》是梓軒一個開始，他希望音樂及戲劇上有不同發展。他說：「除咗演出，都想試吓監製及製作啲作品出嚟。」梓軒完成《利瑪竇》part 2後，7月會和中樂團合作一個crossover的concert，年底亦希望可以做《CROSSING 源‧樂 演唱會》part 2或巡唱。

撰文：機