巴黎奧運｜盼張家朗對手舊患復發 蔡俊彥言論惹爭議 為失言致歉

港隊「劍神」張家朗在男子花劍個人賽過關斬將，決賽更以15：14絕殺意籍好手馬基，成為68年在此項目衛冕的第一人。

昨晚（29日）張家朗在16強硬撼國家隊勁敵莫梓維，終以15：10力克對手晉級8強，其間莫梓維一個跨步後疑似拉傷，當時在ViuTV直播負責評述的張家朗隊友蔡俊彥（Ryan）曾說：「據我所知，佢隻腳有啲傷，唔知有冇觸發到舊患，希望觸發到（舊患）啦﹗」在旁的劉國堅為他打圓場：「總之希望張家朗贏啦﹗」

Ryan的言論旋即引起網民爭議，有網民表示「吓？希望其中1個運動員受傷？」但亦有網民指他可能一時口誤，又認為他為張家朗肉緊。

事後Ryan在社交平台為失言致歉：「對唔住講到好似同frd（朋友）傾計（偈）咁，係到（度）嘴炮對手，絕對唔應該咒對手受傷，絕無此意，會注意表達方式。」有網民立即問他：「你是口誤還是心底話？台灣有在講你！」蔡俊彥再回覆：「不是口誤但非心底話，只是與朋友之間非常低俗的笑話，不應展示在電視節目中，非常抱歉。」

Ryan及後也在電視直播期間跟莫梓維致歉：「其實我同莫梓維都好friend㗎，唔係存心講嗰句說話，我都同佢講咗對唔住。希望遲啲佢來到香港請佢唱K食飯。」

（即時娛樂）