女神配對計劃︱李芷晴扮M痛　關嘉敏爆喊演技100分

無綫熱播戀愛綜藝真人騷《女神配對計劃》，昨晚（3日）播出的第9集中，率先披露了本周日（10日）播出的第10集，5位女神將接到考驗演技與忍笑功力的「神秘任務」，5人分別要扮「唔見咗爸爸送嘅頸鏈」、「收到演出要取消嘅消息」、「扮M痛」、「扮唔見電話」、「扮收到愛犬出事消息」，以考驗同組男士即場反應。預告片中可見，扮M痛的李芷晴、與扮愛犬有事的關嘉敏（Carman）均相當好戲，Carman一度哭至梨花帶雨，演技100分。

而於第9集中「國民CP」葉蒨文（Sophie）與曾展望（GM）的同房之夜雖然有「冠軍零食」加持，可惜卻因同組的林澤謙（Him）及林堡熙（Eddie）亂入毀盡GM雅興，Him及Eddie更分別出動「小禮物」及「真情剖白」與GM一爭長短。

在「三角枱約會」中表現標青的Him，來到Dating Camp忽然大跌Watt，Him坦言是想讓Sophie多些機會了解其餘兩名組員，不過一再強調喜歡男仔主動的Sophie明顯唔收貨，事後她接受製作組訪問時說：「其實我覺得咁樣仲怪咯，因為我甜品時間揀咗阿Him，我哋嘅互動係應該一路Build上去㗎嘛，我冇諗過佢會退到咁後，其實有少少失望架。」為自己表現欠佳解畫後，Him拿出Sophie最愛的「玉桂狗」送給她做小禮物，令Sophie大感驚喜：「玉桂狗喎，有做Research喎！估唔到佢知道我鍾意玉桂狗咯，原來佢畀我想像中更在意㗎喎。」

至於Eddie則大打自己最擅長的真心牌，對Eddie亦明顯有好感的Sophie，一來便追問身為I人的Eddie今天為何表現如此積極？Eddie雖未有正面回應，但事後他接受製作組訪問時坦言：「我希望可以喺我被淘汰之前，畀佢知道我內心更多嘅想法。」他向Sophie透露是參加了節目後才開始在網上搜尋她的社交帳號，嘗試去了解她，並大賣關子指從中找到了二人的共通點，Sophie聞言即認同：「我今日有幾個Moment覺得你好似好明我咁㗎。」

至於昨晚Ending是金牌媒人林盛斌拉着閨密花生團，並宣布：「你哋要將所有女神同男仔重新分配好！」而閨密的回覆是：「我哋Prefer大執」、「今晚邊個同房係唔會再Stay喺佢個Group㗎喇」，意味着「你儂我儂」的葉蒨文+曾展望、林俊其+羅毓儀、梁敏巧+劉啟進將會被拆開，認真刺激！

東網網站 : https://on.cc/東網Facebook專頁 : https://www.facebook.com/onccnews/