游學修自費萬元買飛為睇美斯　批香港人笑自己人「幸災樂禍」

國際邁亞密（Inter Miami CF）上星期（2月4日）與香港聯賽選手隊在香港大球場進行表演賽，阿根廷球王美斯（Lionel Messi）沒有上陣引起球迷及當局不滿。國際邁亞密轉戰日本後，美斯在東京對戰「神戶勝利船」的表演賽中，落場踢足30分鐘。

游學修在香港賽事後曾在「試當真」以「《美欺騙案》受害者訪談」為題出片，內容提到他和另外3位同事自掏腰包買飛入場，卻無緣見到美斯落場，問道「這是一場超過38,000人受害的騙案？」。昨晚（2月8日）游學修再在社交平台發文，提到有不少香港人笑香港人買飛入場為睇美斯，實屬幸災樂禍。

游學修寫道：「通常你笑人受騙，因為佢蠢，佢貪心。今次有幾萬人受騙，有好蠢咩？有好貪心咩？純粹你冇買到佢有買、佢鍾意你唔鍾意，你就水魚呀傻仔呀咁笑得不亦樂乎，簡單講，就係幸災樂禍。世界各地都眼見不公，得你哋自己香港人喺度笑笑笑自己人。利申：有免費飛，但我一早自己買咗。一萬蚊承受得起，感恩。笑我可以慳返」。

另外，游學修在留言欄再補充：「一次過回應埋「冇話過包美斯」：表演賽唔包佢落場幾多分鐘，OK，但呢個票價呢個宣傳，完全唔落場且無提早宣布，無補償，應該無違約（違就一早告咗），但不合理，不公道」。

今日早上有消息傳出，指香港主辦方Tatler Asia最快今日宣布，向球迷退回部份門票款項。另外，深水埗體育會足球隊宣佈憑國際邁亞密表演賽票尾，可以免費睇深水埗主場港超賽事。