煲仔飯達人 醒你煮飯秘訣
香噴噴、熱辣辣的煲仔飯是入冬必備，精髓在於配料鮮香、飯粒分明。好多人以為自製煲仔飯工序多又麻煩，其實又未必，只要掌握到當中竅門，烹調起來一樣鬆輕簡單。佐敦一間煲仔飯專門店的老闆兼主理人梁煒茵（Iris）謂，煮煲仔飯最好由揀米開始，好像水分不會太重的東北大米就最適合。
洗米時要留意不好過分搓洗及預先將白米浸水，以免影響飯粒的煙韌口感。最好將白米沖水兩次洗淨，然後將水分瀝乾，再以1份米、1份水的黃金比例，將米放在煲仔內加水煮滾，然後鋪上配料，冚蓋用中火煮約20分鐘。如想要有飯焦效果，可調校至細火，將煲仔四邊、每邊燙約2分鐘。燙邊時要留意配料的油分是否足夠，否則最好在煲仔圍邊淋上少許油，可以令飯焦更脆更香口。