YEEZY BOOST 700　等足一年終於全球發售

YEEZY BOOST系列由2015年開始推出至今，三年多以來基本上每逢有新鞋款或者新配色推出，大家仍然樂此不疲爭相入手。早於去年已經曝光過的YEEZY BOOST 700就絕對係陣營中最罕一對，雖然一年來呢對鞋款出現於Kanye West腳上絕不止一次，但只係於去年8月及今年3月於YEEZY SUPPLY及美國地區adidas.com突擊發售過少量，能夠成功入手到的人係極少數。當大家以為入手呢對YEEZY BOOST 700無望之際，官方就正式公布於9月15日作全球發售，香港當然都係發售點之一。

擁有當下最備受追捧Dad Shoes輪廓的YEEZY BOOST 700，鞋面部分採用黑色麖皮及灰色優質皮革打造，並襯上藍色網面細節營造出90s復古波鞋氛圍，鞋側灰色網面就暗藏以反光物料製作的三間細節，加入類似潑墨圖案的厚實鞋底更包覆着全掌BOOST中底，為呢對於Dad Shoes熱潮中的風頭躉，提供最舒適穩定的穿着感。

鞋款將會於9月15日全球推出，香港地區入手方法就一如以往都係網上登記抽籤，只要凡年滿13歲及持有有效香港居民身份證的香港居民，便可於即日至9月12日上午11:59期間登入https://reg.adidashk.com 登記，預購YEEZY BOOST 700（須受條款及細則約束）。