楊思琦唱《天命最高》勁攞命　土生土長忽然有鄉音

前港姐冠軍楊思琦，近年北上發展及開拓直播事業，日前佢就跟潮流翻唱《尋秦記》主題曲《天命最高》，本想重溫經典吸Like，點知就引嚟大量負評，得不償失。楊思琦本提到自己與《尋秦記》同年出道，又叫大家多多支持香港電影，大賣情懷，可惜網友一啲都唔畀面，直指楊思琦片中打扮老土，面容因開重濾鏡而變「蛇精樣」。

到楊思琦開聲大唱《天命最高》，網民就直頭劣評如潮，指佢廣東話忽然變得唔正，直斥離譜，又指其唱腔、衣着、風格都好恐怖，個人好似停留係廿幾年前咁：「你個嘴同口音，你一定係假嘅楊思琦」、「美顏開得太勁 好恐怖」、「明明你喺香港土生土長，幾十年一直都係講廣東話，講嘢從來都冇鄉音，點解依家要扮有鄉音😂😂」，對於依家楊思琦驚變「廣場大媽」感失望，其造型及唱腔明顯同網民期望嘅港姐形象有巨大落差，最無法接受楊思琦唱歌時廣東話有鄉音。

東網網站 : https://on.cc/東網Facebook專頁 : https://www.facebook.com/onccnews/