娛圈單打︱國產狗血微短劇　迷死師奶與鬼婆

救命呀，我睇咗啲乜嘢呀？《霸道狼王與純真嬌妻》、《總統愛上清潔工》、《我的億萬富翁老公的雙重生活》……媽啊，究竟呢啲係乜嘢劇情嚟㗎？但你咪理，呢啲內地出品嘅微短劇，唔止雄霸兩岸網絡，仲殺入北美，成為美國師奶嘅心靈安慰劑！

嗱，國家崛起，走出去嘅軟實力，點止哪吒同Labubu吖，呢啲睇個名已經夠晒超現實嘅微短劇，內容無非霸道總裁愛上我、狗血復仇以至婆媳大戰，但意外地大受北美師奶觀眾歡迎！

有內地製作人照抄幾年前流行嘅微短劇內容，換上金髮碧眼嘅美國三四線奀星拍攝，結果票房大爆，一躍而成北美微短劇市場一哥，3個月就斬獲2,500萬美元票房，唔到你唔服！

中國微短劇之所以喺北美爆紅，原來係把握住荷里活2023年大罷工嘅黃金時機。當時荷里活陷入停產，三四線奀星以至幕後人員形同「乞食」。內地公司趁機開戲，靠誇張、懸疑、反轉嘅「黃金三秒」方程式，加上霸總浪漫愛情、婆媳大鬥法等元素，令到一班五、六十路嘅鬼婆睇得如癡如醉！仲帶挈埋呢班奀星片酬水漲船高！

睇到都嘔血！事實證明，橋唔怕舊，最緊要受！皆因全世界嘅中女老女，每日被乏味嘅老公、駁嘴駁舌嘅衰仔、腌尖腥悶嘅奶奶、刻板嘅生活所折騰，惟有喺呢啲微短劇之中，先至可以尋回埋藏心底嘅激情！講到尾，同睇韓劇冇乜分別啫！話時話，呢啲微短劇因為粗製濫造、劇情荒謬，近期遭廣電總局勒令下架，經典如《保潔老媽無極歸來》已被禁，反而美國就大熱，果然係風水輪流轉！

東網網站 : https://on.cc/東網Facebook專頁 : https://www.facebook.com/onccnews/