林憶蓮打住風開騷　驚喜加碼報答歌迷

樂壇天后林憶蓮（Sandy）於7月19、20日及26、27日假澳門舉行共4場《回響》巡迴演唱會，而首場在颱風「韋帕」逼近下開騷，無阻樂迷熱情，全場爆滿。

Sandy演繹多首經典金曲，配合今站是巡演中唯一室內場館，可跟台下歌迷有超近距離接觸。其中獻唱代表作《傾斜》時，舞台機關啟動，她就跟舞者在近30度的斜台上又唱又跳，配合燈光與視覺特效，呈現出強烈空間感，還有唱《遠走高飛》一曲，她坐在風帆船頭上，邊唱邊與台邊觀眾席上樂迷揮手。

演唱會尾聲，Sandy表示希望透過歌曲，為大家帶來勇氣與力量說：「大家好嗎？有好多想講嘅說話，但係都擺晒歌曲裏面。每一晚嘅演出，對我講每一晚都好難忘，希望係呢啲歌曲裏面，都會有你哋嘅回憶、你哋嘅成長。如果未來嘅日子裏，你有任何時刻覺得迷失、傷心，或者唔知點算好嘅時候，希望你哋記得今（19號）晚，記得呢啲歌曲。我哋聚集喺呢度，我哋嘅愛同埋力量、勇氣，希望你哋會記得，如果唔開心嘅時候，可以有用去幫你哋重新Reset。」

Sandy感動地說：「多謝大家！今（即19號）晚可能會唱到天光？出面係咪打風？幾多號風球呀？大家今晚係咪唔返去？我聽到有人好大聲嗌《微涼》，我覺得今晚又打風又落雨，大家咁辛苦嚟到，本來rundown唱其他歌嘅…你哋等等先！」寵粉的她跟演唱會監製倫永亮商量後即拍板加唱《微涼》，以報答歌迷冒風雨仍支持。

由於Sandy演唱會如期於晚上8時開始，演出時長約為2小時15分鐘，完結後已是晚上10時15分，即日來回的香港歌迷較難趕及港珠澳大橋於11時封閉前趕回香港，不少網民在主辦單位的社交平台表達不滿謂：「冇車返香港」、「11pm封橋喎」、「好過分喎，送到口岸就當交左差， 完全唔理觀眾安全」，但亦有歌迷為睇足全場在開騷前訂定一晚酒店，大讚多付房錢也值得。

由於颱風「韋帕」吹襲，為顧及演出團隊及所有觀眾之安全，今晚7月20日一場取消，並延至7月25日舉行。

東網網站 : https://on.cc/東網Facebook專頁 : https://www.facebook.com/onccnews/