伍允龍攻陷亞洲電影節閉幕禮　低胸女埋身唔望一眼

武打影星伍允龍今年終憑電影《九龍城寨之圍城》飾演奸角「王九」人氣急升，圈粉無數嘅佢，最近就同監製莊澄特意飛赴紐約，出席本屆亞洲電影節閉幕禮，而《九》片亦成為閉幕電影。

威到出美國嘅伍允龍一身西裝骨骨，喺紅地氈上深受當地華人喜愛，個個爭住同佢合照、拎簽名，人氣極高，更群情洶湧到令伍允龍都怕醜。見伍允龍分享當日盛況嘅片中，就有位低胸打扮嘅女粉絲向佢索簽名，佢梗係冇托手踭，仲全程目不斜視低頭簽名，完美避開「唔禮貌」嘅視線，以免尷尬，即被粉絲大讚「真君子」。有女網民直言被伍允龍迷暈，指自己等足三小時stand by，又大讚伍允龍真人溫柔又帥，更有人激動大叫「老公」。

不過令伍允龍最興奮嘅係原來爸爸伍紹華都有現身，佢甫到場即成為焦點，伍爸爸為伍家國術會之創立人，喺芝加哥開武館教授蔡李佛拳，伍允龍亦受父親影響，7歲開始跟隨對方習武，依家出人頭地，爸爸值得安慰。

東網網站 : https://on.cc/東網Facebook專頁 : https://www.facebook.com/onccnews/