大埔宏福苑五級火｜網傳中學火警演習訓話錄音 遭質疑在災民「傷口灑鹽」
大埔宏福苑五級大火導致161人死亡，慘劇令社會更重視防火意識，社交平台流傳一段錄音，指新界區有中學一名男教師在火警演習後向學生訓話，引用宏福苑火災作「教材」，質問學生如果自己是災民，會否覺得若當年讀書時認真做演習，死傷數字就會減少，要求學生認真重視對火警演習的態度。惟其言論隨即引爆網絡公審，有網民指當日宏福苑警鐘失靈，質疑其言論與「認真做演習」沒有邏輯關係，批評涼薄及於災民身上「傷口灑鹽」。亦有網民向宏福苑災民播放錄音，對方直言「聽到段錄音好唔舒服，明明(警鐘)都冇響。」《am730》正向涉事中學及教育局查詢事件。
網民指宏福苑警鐘失靈 批言論與「認真做演習」無因果關係
該段錄音可以聽到，該名教師開咪發言稱，「如果你想像番大埔該次火警，你是災民一部份，你覺得你全世人有多少次機會可以做演習」，更要求學生們「問問大埔區居民」，會否覺得若當年讀書時代走火警演習「認真啲」，當日死傷數字就會減少，故再三強調走火警是要訓練學生態度。發帖者質疑「如果學校入邊有大埔宏福苑同學同親戚，可能造成二次傷害，仲話佢哋細個時候我俾心機練火警演習可能傷亡會少啲，大佬呀，人哋都唔想要呢個火警。」
災民聽錄音直言「好唔舒服」
帖文曝光後，有網民即指出該中學名稱。亦有人強調宏福苑火災當日除懷疑與發泡膠及棚網有關外，大部份樓宇警鐘均失靈，逃生後樓梯開窿「木板窗」均是客觀致命因素，質疑男教師的「認真做演習」言論與死傷慘重根本沒邏輯關係，是向災民「傷口灑鹽」，「佢嗰一番說話同受害者有罪論同一個意思，覺得啲災民有死傷係因為讀書時期冇認真走火警演習，呢一個舉例勁唔合邏輯」、「走火警幾認真都無用架喎，個鐘比人熄左呀阿sir，訓醒未？」、「佢想話，大埔火災過身的人，係因為之前沒有認真做火警演習嘅後果？依番言論實在涼薄」、「個老師太唔負責任，因為宏福苑就算你認真走火警，被火重重圍困根本想走都走唔到」、「宏福苑事件根本成個消防系統失效+反正常消防知識，點可以咁比」、「你有知道人地讀書時沒有認真走火警？老師唔好亂講」。
有網民更稱曾向宏福苑災民播放錄音，對方直言「聽到段錄音好唔舒服，明明(警鐘)都冇響，仲有啲老人家點走。」惟亦有網民支持老師言論，「老師都係想你哋認真做火警演習啫」。
睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)