張蔓姿新作《緊張大師》　因太緊張愛人而憂心

張蔓姿新作《緊張大師》搵嚟從未合作嘅曲詞組合，道出因為太緊張愛人而終日憂心嘅情緒。

「如此緊張你所有神經緊張全日守候又見兩剔沒回頭」

當踏入一段關係，固然有幸福甜蜜嘅時候，但有時總會無法控制地胡思亂想。佢依家究竟做緊咩？佢會唔會內心唔係咁鐘意我？佢會唔會突然同我分手？不斷猜疑對方正常不過嘅行為，甚至忐忑整天。為求安心，無時無刻都想貼近愛人。

「胡亂裡幻想不要實據源自我內心可怕的思緒害怕分手流眼淚痛入骨髓」

愛情實在太脆弱，越愛越害怕對方離開，怕會失去生活支柱，怕會傷心到一沉不起。只因內心虛構嘅小劇場，令自己陷入緊張情緒，被恐懼蓋過所有。喺伴侶面前亦難掩擔憂，無法完全投入，相比所擔心嘅事，依種狀態反而更影響關係。

「但我往昔極平和沒顫抖輕鬆過卻因為愛螻蟻踏上煎鍋」

其實一切一切不過係幻想，另一半會唔會同你廝守終生，係要到死個日先可以定論，咁我地係咪要擔心到七老八十？下次當不安感來襲時，不妨回想對方一直以嚟對你嘅愛與關懷，嘗試比自己同愛人多一份信心，好好抱緊另一半，享受當下彼此在旁之溫暖。

「只怪我這緊張心裡誠恐誠惶緣份太易碎」

由上年悲情三部曲到年初嘅《讓我與你在這星球》，就算作品題材未必好新鮮，張蔓姿總能夠唱出特別嘅味道。《緊張大師》亦唔例外，每次欣賞都可以投入喺浮浮地，唔係好安定嘅vibe，非常耐聽。

「直至這生無顧慮八十幾歲緊抱你再張開花蕊狂蜂來遲世間早粉碎」

最後，祝福大家能夠放低緊張大師嘅束縛，好好感受戀愛帶嚟嘅幸福快樂💕

《緊張大師》張蔓姿
曲：JUDE
詞：小克
編：Ariel Lai
監：李一丁

「飄散落漆黑宇宙
都只因你焦慮

原諒我緊張一個伴侶
成就這大師裝嵌出堡壘
直至這生無顧慮八十幾歲
緊抱你再張開花蕊
狂蜂來遲世間早粉碎」

娛樂