鄭伊琪借生日P攻打四方城　大讚仔仔係「運財童子」

藝人鄭伊琪（浩南）2024年年初無預警宣布已懷孕19週，並透露早於疫情期間已跟圈外男友結婚，笑言正式成為「陳浩南」，並於同年5月誕下仔仔Quentin。不經不覺Quentin迎來1歲生日，浩南為仔仔舉行了生日會，她在社交網跟粉絲分享當日的靚相，寫道：「生日快樂啊豬頭B！個個都話咁細個唔使幫你大搞生日，唔使慶祝，但係你好似眨吓眼就1歲，所以少少哋都要記錄低佢，見到你氹到個個開心心，媽咪即刻咩煩惱都冇晒。Daddy話你仲有2年時間做BB，第3年就要畀返個位我～同你爸肩負起重任一齊照顧我。」

浩南笑稱屆時要喊、扭計、發脾氣和找人陪玩的重任就留給她由頂上：「專心上堂、學做家務、氹人開心呢啲簡單嘢就畀你做！爸媽希望你身體健康，開開心心。」她搞笑指以搞生日會為名，實際是給大家圍埋攻打四方城，更大讚仔仔是運財童子：「生日會2個鐘打麻雀3、4個鐘，自懷胎開始媽咪打麻雀未輸過！」

東網網站 : https://on.cc/東網Facebook專頁 : https://www.facebook.com/onccnews/