被指扮大牌冇禮貌叫收皮　陳嘉倩嬲爆凌晨反擊

由新聞界跳入娛樂圈嘅前無綫新聞小花陳嘉倩大受宅男歡迎，不過人紅就事非多，最近就被網民暗指臭寸、扮大牌兼冇禮貌！

呢位網民話代朋友出Post出吓氣，佢話最近公司同一位前無綫新聞主播傾合作：「以前都聽過好多記者朋友話佢好臭寸，我都唔信，話晒都係宅男女神呀，點會唔識得待人接物。」之後佢就爆料指平時約傾嘢，最少遲1個鐘，因為自己係small potato惟有忍：「原來記者訪問，佢都要人等個幾鐘！以為自己係咩？姐仔？有18萬粉絲好威？對不起！你連做人最簡單嘅禮貌都未識！請收皮！以後希望更多人認識你嘅死人性格！拜拜！」雖然對方未有明言係陳嘉倩，但佢上載嘅一張唔見晒樣及打格相，係陳嘉倩自己Post過。

陳嘉倩對於「指控」，凌晨喺社交網間接回應話：「原來依家冇證據就可以隨便定義一個人嗎？尋日余浩宗（前無綫電視新聞主播）話我係男人，唔通我就真係男人咩？」佢又Tag住「一笑置之」、「依家社會上有更多事值得你關心」、「花時間做有意義嘅事對身心更有益」！

東網網站 : https://on.cc/

東網Facebook專頁 : https://www.facebook.com/onccnews/