黎瑞恩經歷失婚、患胰臟瘤 靠仔女走出陰霾
現年46歲黎瑞恩（小恩子）於2014年與前夫曾智明離婚，其後又因大病要入院把胰臟瘤處理，身體亦慢慢康復。經歷高這些不幸的經歷後，幸而堅強的小恩子走過低谷，現時復出娛圈仲獨力照顧一對寶貝子女！而首任做電影女主角的黎瑞恩主演的微電影《骨肉香》，日前入圍兩個海外影展，好叻呀！
編輯：Sunday Kiss｜原文：東方新地 ｜圖片來源：新傳媒圖片、黎瑞恩Facebook、黎瑞恩Instagram
黎瑞恩首當女主角 入圍兩外國影展
黎瑞恩和鮑起靜早前為2018-19年香港電影導演會大師班的微電影《骨肉香》擔任主角，全片長25分鐘，小恩子飾演育有一名女兒的女強人，鮑姐則飾演吃人肉才能維持生命的外婆，更一度想吃孫女的肉，情節認真恐怖，該片早於月前已在學生的畢業禮中播放，據知首任做電影女主角的黎瑞恩和鮑姐得悉導演會是為港片培育新血，二人為支持新導演而不收酬勞仗義演出，小恩子更多次萬歲請大家食足三餐，令一眾同學好感動。
該片導演兼編劇潘梓然公布喜訊，《骨肉香》成功入圍歐洲斯洛文尼亞「Grossmann Fantastic Film and Wine Festival」，及印尼峇里舉行「MINIKINO FILM WEEK (MFW) – Bali International Short Film Festival」。
婚後退出娛樂圈
現年46歲黎瑞恩，90年代是寶麗金力捧的玉女歌手，金曲《一人有一個夢想》、《愛你這樣傻》迷倒萬千少男，後來02年黎瑞恩跟金利來集團主席曾憲梓兒子曾智明結婚，婚後退出娛樂圈專心教子。
與前夫離婚：婚姻一場賭博
可惜二人在2014年宣布離婚，小恩子取得一對子女撫養權做單親媽媽。小恩子曾形容婚姻是人生一場最大的賭博，過去11年的婚姻生活，經歷了不少快樂時光，亦得到兩個可愛小朋友凱栭和浩儒。但人會變，婚後幾年已感到一個走去火星、一個走去月球，雙方的步伐愈走愈遠。她檢討過可能是自己把時間全放在小朋友身上，忽略了前夫，而且自己說話太直，傷害了別人也不知道，導致兩人爭拗漸多。小朋友看在眼裏，勢會影響成長，兩人不得不作出重大決定。「有時拗完媽媽會喊，爸爸又黑曬面，咁樣唔係幾好，父母係子女一面鏡，係模仿對象，如果父母開開心心，佢哋咪會開心。」
決定分開後，小恩子有如釋重擔的感覺，「分開未必唔係一件好事，可能喺小朋友嘅角度會有啲遺憾，唔係一個有爸爸媽媽嘅屋企，但如果爸爸媽媽唔夾、唔開心的話，日日見到爸爸媽媽咁樣，其實都影響佢哋長大，即點樣睇男女關係嘅心態，甚至令佢哋有陰影，以為屋企人相處係燶口燶面。」不過，其實黎瑞恩 離婚後，曾有段時間一度鑽進牛角尖不能自拔兼患上抑鬱，後來終走出陰霾，與前夫曾智明關係緩和。
女兒欣喜父母開心
孩子面對父母分開，難免會出現負面情緒，尤其女仔心事較多，小恩子需要為凱栭作出輔導，而浩儒當時只有8、9歲，未知發生甚麼一回事。「家姐有少少嘅（情緒變化），我有同佢傾過，爸爸媽媽係分開咗，但佢覺得我依家仲開心，爸爸又開心咗，所以都冇乜嘢。」小朋友開頭有段時間不開心，但返學發現有同學的家庭情況差不多，生活也是如常，慢慢就放鬆心情，小恩子說：「佢內心深處點諗我唔知道，但佢有日放學返嚟同我講：唔緊要啦媽咪，我啲同學都話佢哋爹哋媽咪都係咁。」時間可以沖淡一切，好快凱栭見到媽咪開心，自己都豁達了，「佢見到原來咁樣父母係開心啲，好快就冇嘢，仲 話『依家仲好啦，我哋仲開心！』」
患胰臟瘤
其後，小恩子做身體檢查時，又發現胰臟生了兩個1.5cm良性腫瘤，更在facebook post出：「唔知喺手術室開live會點呢？」，由於當時小恩子有排山倒海的工作要待她處理，所以趕快入院把腫瘤處理掉，她更直言生死由天安排。幸而手術後已康復，近年更復出娛圈！
小恩子獨力養育一對子女，15歲大女曾凱栭及14歲細仔曾浩儒同佢感情好好，兩姊弟先後去到澳洲讀書，而小恩子都不時到當地探佢哋。
小恩子上月就去澳洲探一對子女，仲喺社交網曬出多張合照，大女Sheree愈大愈靚女，果然遺傳媽咪最強DNA！
去年﹐小恩子接受本刊訪問，身為單親媽媽的她被問到壓力是否更加大，佢話：「咁又冇喎，其實一個人有冇壓力係你自己畀嘅啫，冇話單親唔單親嘅。我以前都會居安思危，會諗依家生活好好，如果有一日生活唔好咁點呢？我都會教啲小朋友自己煮飯、學洗衫、摺被⋯⋯當有一日，冇晒啲工人，你點呢？生活唔到呀？唔會㗎嘛！我如果有咩事，我有咩辦法可以能夠養活到自己呢？我會唱歌㗎嘛，唱歌、做吓騷都應該OK嘅！」講到有傳攞咗好大筆贍養費，黎瑞恩笑問：「幾時攞㗎？冇囉，哈！但我前夫對我哋都好好，都好照顧我哋，都好多謝佢。我同前夫依家關係良好，最緊要大家開心。」
再拍拖要顧子女感受
黎瑞恩直言如果佢要拍拖嘅話，男朋友一定要好錫佢啲仔女，又笑指：「唔知佢哋畀唔畀呀，佢哋會話：『最好唔好啦，最好我霸晒你啦，你都唔夠時間畀我哋，仲拍乜嘢拖吖！』」而問到黎瑞恩仔女有冇演藝潛質？如果佢哋話做呢行畀唔畀？黎瑞恩話：「有㗎，我唔會話唔畀囉，最緊要讀晒要讀嘅書先，到時你自己選擇，我畀佢自己選擇。」
「唔覺得有需要再結婚」
問黎瑞恩仲相唔相信婚姻？佢話：「喺我呢個時間，我唔覺得有需要再結婚，如果有一個啱嘅人，一齊開心咪得囉！」仲可以追多兩個？「嘩！唔追啦，唔好玩啦，哈哈！好嘥神㗎，仲要教佢呢，我成日覺得湊一個細路唔係有錢就得，要有人幫你湊啦，唔係淨係湊咁簡單，要用心機教。」