【演唱會現場】一夜傾情 沉醉於黎明歌聲
「沉醉於甜蜜歌聲 抱擁所愛 令世間頓成仙境」身邊很多朋友睇黎明演唱會，但同時有很多人問點解睇他的演唱會。鍾意黎明，真係明就明的一回事。
純粹從演唱會製作角度睇，這晚的演出其實有好多問題。例如舞台上有好多支射燈，但只得幾首歌用得好。有好多個熒幕，但播放的映象大部分都非常generic，而且無原因可言。舉例就係《沒名字的歌，無名字的你》同樹究竟有咩關係？《我會像你一樣傻》點解會突然有幾個性感女舞蹈員無前無後地出來伴舞一首，又點樣連繫到熒幕上的花及煙花？
中間那節talk show，我其實get唔到重點。林日曦做嘉賓，hehe拖手唱《但願不只是朋友》，我ok的，但場內更高年齡層的觀眾無反應。快歌不多，但一如近年的演出一樣，楝篤企，但我成晚仍然睇得開心，因為他的現場演出睇一次少一次，而且這次有一種疑似告別退休的感覺。
全晚絕大部分的歌都是千禧前的作品，亦近乎用原裝編曲直出，明顯是經典回顧。和記廣告歌，我當然希望他可以由《夏日傾情》開始逐首唱，但這晚最少唱了最紅的幾首，而且還播了少量廣告片段，加上演唱會開場及過場，穿插成長片段式昔日演唱會flashback，回顧他當年依然在台上識郁的風采。整個安排就似是有今生無來世，下次唔知幾時再見，所以這晚有時間我就叫幾聲Leon，唔係唔知幾時先再有機會叫。既然首首經典，我就由頭到尾都有跟住唱。
好唔好睇？你唔熟他的歌，唔會覺得好睇，仲會嫌短。但當你由細到大都有聽他的歌，這次應該收貨。演唱會完場時，大熒幕再問：「萬一怪獸打不完，你會不會陪我留在地球？」更加是神到不得了。
事實上，四大天王中，他唱歌跳舞都肯定不是最好，但他的歌好好，快歌易記，慢歌又冧，而且和記廣告真係勁好睇。四大天王中，亦只有他會令我睇到當年的蘋果日報全版廣告，講明幾點電視首播後準時錄低狂睇。四大天王中，我買他的唱片數量，是其他三人合共的十倍。過去廿五年，他的演唱會我亦每次都有睇。鍾意其實就係鍾意咁簡單，鍾意就會令全場無人知《但願不只是朋友》點解副歌要「奶奶奶奶奶」，都會想跟住唱。
黎明，真係好特別的存在。
Text: Chucky @ Music Picks