傳保錡臨時替隊友做主持　193澄清：唔好盡信

《全民造星VI 總決賽》於前晚（4日）在澳門舉行，由強尼擔任大會主持，而ERROR成員阿Dee（何啟華）和吳保錡則負責於台下訪問評判團，包括古天樂和梁詠琪，而保錡以「港式英文」訪問韓星，被不少網民和觀眾批評「令人尷尬」、「拉低水準」等。有傳本來保錡的主持位置是由193（郭嘉駿）負責，ERROR的經理人濟哥在社交平台發文為保錡解畫，但半日後193留言表示，「唔好盡信我經理人講嘅嘢」。

ERROR的經理人濟哥昨日在社交平台發文，提到保錡的英文與港式普通話：「唔係執係頂，得兩日就係仲要今日5/1有工作，知道要幫手我同佢講都即刻肯嚟頂，仲要佢早一日嚟咗production，叫佢幫手排一排，佢都即刻過黎排同夾下稿，訪問係得古生同gigi 喺稿上面，因為直播要拖所以新加訪問，佢哋唔知有翻譯，英文講得唔好叫唔尊重，咁大家以後唔好用你啲港普啦！因為咁樣係好唔尊重！對唔住大家我以後都唔會講港普尊重thanks」。

濟哥在不少留言下回應，提到：「都話本身就冇準備要同孝淵接觸，因為live係做完古生同gigi 仲要拖，節目組臨時叫，佢哋兩位真係冇諗過要同孝淵訪問。如果早啲可以準備一定會做得好啲啦，下次我哋會再超前準備多啲諗多人哋嘅多十步」。

而最令濟哥生氣是有ERROR粉絲針對保錡：「最嬲係同團嘅fans，你哋咁想error 小一個人咩？Error 由頭到尾都係四個人，小（少）咗個仲點做慌失失企鵝呀？」濟哥再次強調保錡今次「好幫手」：「佢係仍然有好多嘢要做好，同埋做過好多錯嘢，但我真係唔係為咗幫佢解話，只係就今次件事俾人鬧得咁行有啲嬲啫，因為佢都真係好幫手今次。」

至於被指兩日前才「辭去」主持一職的193，相隔半日後在網民留言下回應：「Hi，其他嘢我唔方便評論，亦都唔覺得需要評論，正如我都唔覺得經理人應該亂發言一樣。不過你（網民）好似有啲誤會，以正視聽所以我都要講一講：首先係請大家千祈唔好盡信我經理人講嘅嘢；二，唔知你點樣聽返嚟係兩日？我肯定就最少有六日。又，點解係無暇出席？邊個講㗎？同埋其實係可以唔需要人頂替嘅。」濟哥之後再發文：「我講清楚係，我冇話193兩日前通知呀，係話兩日前叫保錡頂咋」。