Ray Online｜楊何蓓茵兩個月去兩次捐血站 一原因許下承諾終兌現
開講有話，捐一次血可以救3個人。公務員事務局局長楊何蓓茵喺兩個月內就兩度親身到訪捐血站，身體力行支持捐血救人。不過佢就話，第一次去到嗰時原來因為身體唔舒服兼食緊藥，醫護人員評估後話唔可以捐，結果要等到康復後先成功捐血，兌現對自己嘅捐血承諾。
呼籲加入捐血救人行列
楊何蓓茵喺社交平台分享呢段佚事，講到今年6月香港紅十字會輸血服務中心喺政府總部一連兩日設立流動捐血站，佢本身已計劃到場捐血兼做足準備，包括喺捐血前一日食用含豐富鐵質嘅貝類食物，攝取更多鐵質。好可惜事情嘅發展不似預期，原因係捐血前幾日因為身體唔舒服開始食藥，到捐血嗰日療程仲未完，醫護人員就話佢唔可以捐血。
雖然有啲失望，但楊何蓓茵當日仍然有手持「公務員事務局支持捐血」嘅手舉牌「打卡」，希望支持下到場捐血嘅同事。事後佢都一直希望可以捐血，結果今個月完全好返之後，就去到灣仔入境事務大樓地下的灣仔捐血站兌現對自己嘅承諾。佢提到只要有心，抽啲時間就可以捐血，呢樣既係挽救生命嘅直接行動，亦為病人及其家人送上希望，又呼籲更多市民加入捐血救人行列，成為恆常捐血者，一齊確保血庫有充足血液供應。
▼血型，A、B、AB及O型邊種最常見？▼
睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)