尋找跑會的故事 #18 | 深淺南．失落的初心

約10年前一班南區跑友自稱「南跑友」，自發每逢周日早上天未光於淺水灣集合，先往深水灣方向跑去，折返回淺水灣繼而直隊南灣，再原路返回淺水灣起點，路線10km鬆啲，兩轉剛好一個半馬。輾轉10年，呢班友呢條路線低調地流傳至今，參與跑友由10零歲中學雞至熟成老友記，難得仍風雨不改，哪管大熱天時30幾度抑或天寒地凍得幾度，準時晨6起步，跑團命名「深淺南」。

Screenshot

奇趣嘅係，本以為大概係一班長輩級晨運客瞓醒無嘢做嚟晨運吹水聯誼飲早茶，及後才發現此團充斥著大量高階跑手，有正積極備戰六大的、即將遠赴法國挑戰UTMB的、打算參與學界賽事的，sub 3跑手以至三鐵運動員…..

一個純靠口耳相傳、自由加入、無教練、無program、無人理你嚟唔嚟，無人理你跑幾多、連飛卜埃豬都係近排先有嘅民間自發跑團，竟自行運作逾10年之久，參與人數更與日俱增……咁嘅現象估計大概需要一噸熱血一團燒得熾熱嘅火，再加一個我哋經常開口埋口講嘅「初心」先會出現。

但其實咩係「初心」? 咩為之跑步嘅「初心」? 呢段時間一直思考呢個問題。

回想起自己最初想跑步嘅原因，好基本好純粹，畢業後去咗尼泊爾行山旅行，見識過遍地艷麗嘅紅花及繁星點點嘅夜空，再襯個喜馬拉雅山背景，嗰刻好想有強健體魄，為求可跑遠啲跑耐啲，飽覽更多壯麗景色，回港後二話不說加入跑班，霎時衝動得嚟帶點戅鳩，但熱血蓋過一切，型咗先講 !

經過數年跑班嘅洗禮，滿腦盡是 interval、tempo、LSD、program、sub 4 sub 3…..報比賽、苦練、比賽、休息，再報比賽，再苦練，追時間，超越自己……blablabla。然後有一天，突然感覺倦了，回頭看，曾說過的「飽覽更多壯麗景色」呢? 有兌現過嗎? 才猛然覺醒當年畢業旅行回來後，加入跑班竟係為咗 interval? tempo? LSD? 初心呢? what the hell i’m doing here?

不得不向「深淺南」仝人說聲多謝，因為你哋，那個被淡忘咗嘅初心給找回來了。

過去10年，呢班南跑友不為甚麼，就只為某年某月某日想一齊跑吓步，於是定下每個周日早上天未光嚟到淺水灣晨跑。然後一個眼神一個點頭一個微笑，對錶，起步。今日跑幾多? 咩披醒? 關人旦治….教練? pacer? 課表 ? 通通欠奉，嚟到深、淺、南，就只有清新嘅空氣、讓人心曠神怡嘅海景、清脆嘅雀叫聲、充滿節奏感嘅腳步聲，清澈見底嘅純粹，同埋失落多時嘅初心。

無論閣下是否南區跑友，不要問，只要跑!

The post 尋找跑會的故事 #18 | 深淺南．失落的初心 appeared first on Fitz 運動平台.