姜濤疑約滿後「轉會」　AK：我就準備轉去…

男團MIRROR成員江熚生（AK）近日推出首張個人專輯《The Trip》，今日（17日）在商場舉行簽唱會，吸引數百粉絲撐場，場面熱鬧墟冚。AK現場跳唱《叛逆動物》，與粉絲玩遊戲炒熱氣氛，之後演唱新曲《愛應該怎麼辦》後，與粉絲大合照，並開始簽名會，與粉絲近距離互動。

AK受訪時表示首次舉行簽唱會感覺很夢幻，由出道至今第8年，能夠逐步逐步實現自己的願望，一切都得來不易，雖然曾經有迷惘的時刻，但可以從粉絲處得到力量重新出發，因此很感激大家的支持和鼓勵。剛從澳洲出席音樂監製陳考威與前Super Girls成員陳穎欣（Yanny）婚禮回港的AK，指很開心在當地見到很多朋友，可以有時間聊天，尤其開心見到填詞人黃偉文、余文樂及音樂人潘宇謙，表示余文樂是自己很喜歡的偶像，更透露兩人之間有互相交流電單車，亦希望有合作機會。

有份在婚禮上獻唱的AK透露唱了自己其中一首慢歌，但笑言感覺不是最適合婚禮的歌，因此希望之後可以出更多甜蜜曲風的歌，問到是否要有甜蜜感情作靈感，AK表示：「咁又唔關事嘅，我覺得我作為一個故事嘅傳達者，就算我有冇感受到嗰個Sweet，我啲戲應該都可以交到份功課。（個婚禮有冇啟發你？）個婚禮好浪漫好靚，佢哋First Dance嗰Part我好鍾意，如果我有一個婚禮我都想有。（令你有衝動快啲結婚？）我呢啲咁理性嘅人，感受完人哋浪漫填補心靈之後，返到香港就回歸現實。」

講到戀情方面，AK直言冇特別去想，順其自然，亦認為自己事業上仍有很大的發展空間，笑言男生不用太急，自己繼續做住浪子先，疑問到若果有戀情會否選擇公開？AK坦言：「想公開咪公開，唔想公開咪唔公開，其實我覺得冇一個指標，因為好睇個人，同埋呢件事本來就唔需要交代，如果唔想公開冇人逼到我。」提到同樣有出席婚禮的隊友陳卓賢（Ian）日前接受訪問時，表示受婚禮啟發在回程飛機時創作了半首歌曲，AK就指如果自己創作可能是有關兩人私訂終生承諾的歌，認為Ian是受浪漫氣氛感染下才產生這想法，更笑言：「如果架飛機少震啲，佢可能就創作咗成首。」

最近有傳姜濤約滿後有意「轉會」另一間國際性唱片公司，以拓展海外市場，AK表示：「成日都搵個榜首開刀亂咁噏，我就準備轉去曼城睇波，或者啱啱去完澳洲見到網球都幾好玩。（冇聽過呢件事？）梗係冇啦，有都唔會傳去我耳中，我咁低級。（你嘅合約係咪都差唔多？）應該大家年期都差唔多。（公司有冇同你傾？）輕輕咁問過吓囉。（你意向如何？）意向就係專心工作先。（有冇人拉攏你？）冇啦，暫時呢個新舊約問題都係我入行首次遇見，我會靜觀其變，睇吓有咩發生。（咁公司最近架構變動有冇影響你？）其實唔大嘅，都係上層嘅嘢，我主力Focus喺自己工作。」

東網網站 : https://on.cc/東網Facebook專頁 : https://www.facebook.com/onccnews/