「新城．樂動區區《風旅．啟航》」Busking 炎明熹 x Michael C 元宵節街頭音樂會 歌聲響徹黃埔天地 場面墟冚

炎明熹（Gigi）正式加盟Sony Music大中華區後，於3月1日元宵節前夕亮相黃埔天地船景街，與師兄Michael C一同參與由新城廣播主辦、黃埔天地全力支持的「新城．樂動區區《風旅．啟航》」Busking活動。這是她加盟新東家後首次以街頭表演形式近距離接觸樂迷，現場氣氛熱鬧溫馨，吸引大批市民駐足欣賞。

活動由新城知訊台主持黎莉擔任司儀，Gigi與同門師兄Michael C分別獻唱，攜手帶來「風旅．啟航」主題演出。率先出場的Michael C獻唱《戀愛BB班》及方大同medley《愛愛愛》、《每個人都會》、《才二十三》，他坦言：「上年三月好唔開心，方大同離開咗，依家都好掛住佢，今日將佢幾首歌整成medley紀念佢。同埋佢出咗新MV，希望大家可以支持佢。」現場粉絲大讚Michael C有才華又靚仔，他即笑言：「因為有你哋喺到！」

Gigi緊接登場，特別為歌迷獻唱五首歌曲，包括《風的形狀》、《我真的受傷了》、《是什麼讓我遇見這樣的你》、《大開眼界》及《風旅》，以歌聲陪伴大家迎接佳節。主持黎莉問Gigi元宵節會如何度過？她表示：「就係會食湯圓，大家估吓我最鍾意食咩味嘅湯圓？就係芝麻同花生。」演出期間，Gigi十分照顧粉絲，不時前後左右轉身，照顧四方八面的支持者，有粉絲搞笑大叫：「你背脊好靚。」

Gigi又邀請粉絲開啟手機燈，營造一片浪漫燈海。現場更有不少粉絲向Gigi大派利是，令她應接不暇，惟有不停說出祝賀說話，場面喜慶熱鬧。獻唱最後一首歌《風旅》時，全場粉絲為Gigi伴唱「woooo」，場面溫馨，為是次Busking畫上圓滿句號。

Gigi受訪時表示，對上一次Busking已是五年前跟表姐在尖沙咀表演：「所以今次嚴格嚟講係我做歌手嘅第一次Busking，好開心可以見到粉絲朋友們，大家都好享受我哋一齊嘅時光。」談到現場氣氛，她說：「今日氣氛好好，雖然天氣陰陰地，甚至有微微雨，但我知佢哋（粉絲）朝早七點幾就嚟搵位，我好佩服大家嘅毅力。每一次做騷見到佢哋，心情都會定落嚟好多，佢哋真係氣氛製造組，有佢哋就有氣氛。」

對於粉絲熱情派利是，Gigi笑言：「我最開心係見到大家，但真係估唔到大家會準備利是，謝謝佢哋喺混亂之中好守秩序。」談到新年願望，Gigi除了希望推出更多歌曲，更透露馬年想學騎馬：「我好想學好耐，但一直未有機會。同埋好想同師兄Michael C有合作機會，希望可以請教佢結他知識。」她又笑言今年度過新年的方式比較多是睡覺：「今年比較少見到親戚們，所以多咗時間瞓覺，而且瞓得好開心。」

Michael C受訪時則分享在黃埔演出的感受：「黃埔係一個好特別嘅地方，因為我自己喺呢度長大，所以今日有機會嚟到呢度做Busking，感覺好似穿梭咗時空，好懷念。」對於首次與Gigi同台Busking，他表示：「好開心，如果有機會同佢一齊玩音樂，甚至一齊合唱，會係一件好好玩嘅事。」對於Gigi想請教結他，他即爽快答應：「當然要教！我都想同佢請教好多嘢，譬如唱歌點樣可以唱得再輕飄飄，好似佢首《風旅》咁，我都好想同佢學習。」

圖片：新城廣播