政Whats噏：「我們不再是我們」？　游蕙禎退出青年新政

因宣誓風波而被禠奪議席嘅前立法會議員游蕙禎，從政以來都以青年新政牌頭示人，不過今日(28日)起大家都要改改，事關佢就喺Facebook上宣布退出青年新政喇。

游蕙禎今日就發文同上載4年前青年新政成立時嘅記者會相片，提到加入至今4年幾，身邊戰友都係佢走落去嘅力量，但自己亦有無可言喻嘅歉疚，因為到現時都畀唔到咩佢哋，而過咗4年或到要重新變陣嘅時間。

佢就話，人同人嘅關係不時有改變，有時係戰友、同道，有時亦係依靠，關係唔應該因組織去概括，所以離開後仍然係心中有位置嘅朋友，而佢今次同青年新政講再見，但佢同呢班戰友就必會再見咁話。

游蕙禎公布消息後，唔少網友都留言同關注佢嘅最新路向，好似有人關心佢係咪正式淡出，以後政治係咪唔關佢事，亦有人問到係咪另起爐灶喎。

東網網站 : https://on.cc/

東網Facebook專頁 : https://www.facebook.com/onccnews/