喂～放假未呀？

經過好漫長嘅2020年🎉，新嘅一年終於都到喇！🎇

雖然今個新年都要喺疫情中渡過，無得去旅行又無得開party，但係放假嘅味道始終係都係好濃郁嘅…

唔知大家呢排有無覺得好攰、懶洋洋、踢都唔想郁呢？

好似無乜動力溫書/做嘢，仲要效率勁低？成日都掛住假期點休息/點去玩？無無聊聊又會走去loop下手機，去fb/ig/mewe睇下人哋放閃，上購物網睇下禮物又過左一日?

「點解會咁😪hea？」

可能係因為我哋太攰喇！2020年對香港人嚟講一啲都唔容易。

社會上不絕於耳嘅矛盾、爭吵、謾罵；加埋四波疫情嘅反覆折騰擾攘，一陣study/work from home，一陣又話要追番進度/業績。無論係學生、打工仔定係老細，都比呢個動盪不安、變幻無常嘅時勢搞到氹氹轉，而偏偏堅毅不屈、責任心重嘅香港人又喺呢個時候發揮出獅子山下精神，💪🏻堅守崗位，為生活、家庭、學業/事業、夢想……繼續努力打拼。

香港人何止身累，😔心都好攰喇！

年末假期，想慢落嚟hea下唞下都係人之常情吖。休息，純粹就係為咗休息囉！

「可能我哋對假期有太多遐想同期望」

做得咁辛苦，假期都總要比番啲獎勵自己嘅。呢啲獎勵可能係去個旅行✈️，可能係同朋友/家人gathering👨‍👩‍👧，可能係去shopping買衫買禮物💰🛍，可能係食好西🍽…

但係今時今日要做得到上面嘅獎勵就唔係咁容易喇，要考慮下袁教授同竹君姨姨嘅建議，諗下限聚令之下點樣可以安全地見下面，交換下禮物，食下好西，或者出去行下散下心。

喺有限嘅條件之下，要一次過滿足曬咁多個願望，簡直絞盡腦汁。唔小心分咗心，搞到無心向學/工作都唔係好出奇姐。

「可能係我哋太有責任感」

除咗安排活動，放假之前我哋都係會想清曬手頭上嘅工作💻，交帶好啲手尾嘅。一方面自己放假放得安心，放完假返嚟又係一個新開始；另一方面就梗係唔想留低蘇州屎，比老闆同事唾罵啦！

就係咁，充滿責任感嘅我哋要兼顧工作上嘅to-清-list，又要處理假期嘅to-do-list📝，真係好忙好大壓力架！

間唔中逃避一下，放慢手腳，或者task shifting一下，明嘅明嘅，唔完美但可以接受。

「可能我哋要適應一下」

平時我哋開行turbo做嘢，乜都唔洗急最緊要快，唔洗岩最緊要準，而家放假喎，係放假喎，個turbo完全可以龜速🐢咁行。

不過由極速到龜速都真係要啲時間適應嘅，情況就好似要一架開到full speed嘅車🏎要剎停咁，除非我哋係浩南哥下下都飄移姐，唔係嘅話都係要慢慢減速嘅，而假期前呢段hea hea哋嘅時間，就正正係一個緩衝同適應喇。

講就係咁講啦，唔知放緊假嘅你同未放假嘅你認唔認同呢？

想知多啲，可以睇吓以下呢篇文：
https://thepsychologist.bps.org.uk/volume-28/august-2015/making-holidays-work

          View this post on Instagram                      

A post shared by 吾係心理學家 Hi Psychologist! (@hkhipsychologist)