長裙婦旺角超市高買　職員捏頸「押犯」推撞撳地惹爭議

旺角上海街一間超級市場周一（16日）發生店舖盜竊案，一名中年女子於店內偷取近千元的紅酒及洗衣珠，被店員當場擒獲。周四（19日）有網民上載兩條影片，見到女子犯案後跑離超市，但被男職員左右捉手兼揑後頸「押解」返店，雙方糾纏期間，有職員喝罵及大力拉扯，其間更推撞阻止她離開。片段引來網民熱議，有人質疑職員對待疑犯行為過於粗暴，「個職員無必要郁手郁腳，最後還拉人頭髮」。

56歲女偷取紅酒洗衣珠被捕 據報亦有超市高買前科

警方指周一晚上近11時接獲上海街一超級市場職員報案，指一名女子偷取兩支紅酒及兩袋洗衣珠，總值約948元。警方拘捕一名56歲姓吳女子，涉嫌「店舖盜竊」，交由旺角警區刑事調查隊第4隊跟進。據報女子早前亦曾在超市高買。

兩條影片合共長逾7分鐘，其中一段影片可見，職員與身穿連身裙的赤腳女疑犯，在店舖對面路邊拉扯。女疑犯遭一名男職員與一名戴手套男子，左右捉住雙手「押解」返店，亦有一名女職員亦有協助。片中可見，該名男職員曾揑住疑犯後頸。

另一片段可見，女疑犯被該名男職員及手套男撳於門口地上，她試圖站起時一度被職員推跌，3人互相拉扯，女疑犯欲離開超市，期間男職員曾多次呼喝及推撞：「唔好郁啦，企定定啦…偷嘢就係偷嘢，唔好講咁多！你有咩同警察講…坐低啦，唔好暴力呀！」職員再從後捉住女疑犯雙手，混亂間疑犯再度倒地。

網民質疑過份粗暴

片段引來網民熱議，有人認為職員行為過份粗暴，「偷嘢唔啱，但點解暴力對個女人？」、「一定要咁樣整傷人㗎？仲學人按頸？唔識就唔好亂嚟！」、「個職員無必要郁手郁腳，最後還拉人頭髮」、「按住就可以，不用太暴力」、「其實唔俾佢走就可以，無謂動粗」、「隨時惹禍上身」、「人哋告返你非禮你就死」、「反而個女店員無幫手？」亦有人認為職員如此行徑無可厚非， 「個女人成日想偷走， 話兩個男人過份武力？」、「經濟唔好，多咗人偷嘢」。

原文刊登於 AM730

睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)