江若琳宣布開騷　舊作品失而復得超感動

歌手江若琳（Elanne）現身啟德出席《The Witness心的見證演唱會2025》新聞發佈會。她表示對上一次在2017年舉行演唱會時仍尚在打官司，在唱到最後一首歌時忍不住爆喊，因為覺得自己以後不能再唱歌，要與歌迷天各一方，幸好如今雨過天晴。提到今次演唱會主題是「The Witness」，她解釋道：「我以前喺法律上面成日見到呢個代表見證人嘅字，見咗好耐見到我驚，但而家睇返，覺得見證呢個字好美麗，代表我嘅朋友同歌迷見證我嘅成長同經歷，見證我重新出發。」

Elanne日前在社交平台表示成勁功取回20年的音樂母帶，她指能取回是當初的判決結果，但程序上她從無想過自己能取回，所以當收到前公司消息時像發夢一樣，感動到喊，見回20年來的心血作品就像自己的「親生仔」，加上在準備宣布開騷前收到，直言是最好的時間點，她續指之後計劃會將眾多作品再上架，部分作品則需重新編曲，笑言：「18歲嗰時唱嗰啲，而家真係唱唔掂」，回望過去的一切，她坦言很值得和開心。

問及老公有沒有為此開心事慶祝，她笑指老公沒有儀式感，但他是與自己攜手衝過終點的人，亦感到相當興奮，令她感慨一切得來不易，直言所有作品對歌手而言都是寶貝，形容開箱音樂母帶時，就像姑娘抱着剛出世的孩子給自己看一樣，十分感觸。提及開騷時老公同囝囝會否到場支持，她表示：「一定會，囝囝就算第二日要返學都唔緊要，因為佢成日都話想睇媽媽喺台上表演，佢係我最忠實嘅歌迷，亦都係因為佢令到我有想唱返歌嘅衝動，所以佢一定要嚟睇。」

Elanne續指囝囝對各樣運動沒有太大興趣，反而鍾意打鼓同表演，有時她回到家中很攰時，都會俾囝囝叫她唱歌自己則打鼓，母子夾band，她指與老公都會叫囝囝比心機讀書，問到是否不想囝囝入呢行？她指：「真係唔想啊，即係我自己都經歷咗咁多嘢，呢行要承受好多壓力，我唔想佢要面對呢啲嘢。」

此外，Elannie預告演唱會上會演唱返歌迷的童年回憶，亦會有跳舞環節，笑言自己這副老骨頭要努力排練。問到演唱會邀請誰做嘉賓？她指：「仲傾緊（你老公？）佢會破壞氣氛，我哋兩個都會忍唔到笑，佢嗰晚職責係湊仔。」

東網網站 : https://on.cc/東網Facebook專頁 : https://www.facebook.com/onccnews/