新戲cosplay白雪公主小紅帽成焦點　黃潔琪期待與袁詠儀扮演安妮亞母女

馬來西亞電影《OMG！阿媽有喜》近日在香港上映，袁詠儀（靚靚）及「翻版林明禎」Miko黃潔琪片中飾演母女，而Miko在電影中更擔任網紅，不時cosplay角色，她笑指要cosplay《SPY×FAMILY》，袁詠儀扮演媽咪約兒，Miko則扮安妮亞，令人期待。

《OMG！阿媽有喜》上映後，不少網民評價導演對袁詠儀演出高齡產婦角色，無論演技和外型都恰如其分，故事情節令不少觀眾有共鳴感。而戲中飾演靚靚囡囡的Miko則成為焦點熱話，她戲中所飾的網紅，cosplay白雪公主和小紅帽的造型可愛，獲得不少男fans點讚，還建議她在網上扮演更多不同的Cosplay角色，讓一眾網民投選心中最愛。

Miko喜出望外的說：「哎呀，我都唔知道原來大家對我戲裏便Cosplay嘅角色咁留意，自己都覺得好有趣，所以之前首映有網民建議我用白雪公主造型出現，大家都好有諗頭！」至於現實生活中，自己最想Cosplay什麼角色造型？她笑說：「其實我冇特別玩Cosplay，所以今次電影裏面嘅白雪公主、小紅帽我都覺得好新鮮，不過卡通人物中我就最喜歡櫻桃小丸子，因為我同佢造型都係齊䕃有啲似，加上面形圓軲轆。可能我哋係失散咗嘅姊妹…哈哈！」

假如要跟袁詠儀母女Cosplay，那一角色會適合？她不禁的說：「呢個考起我，不過《SPY×FAMILY》裡面嘅角色，靚靚姐可以cosplay 媽咪約兒，我就扮安妮亞，大家都係齊䕃，我又係好鍾意粉紅色啱晒feel！我都好期待同靚靚姐一齊搵吓Cosplay。」