50歲電台DJ泰山確診前列腺癌第四期 一度擴散全身骨頭

50歲電台DJ泰山數月前突然工作量大減，網上頻道更自5月尾起沒有更新，同時暫停了電台及節目主持工作，直至上月初才再次開咪。泰山今日（23日）凌晨在網上頻道上載新影片，透露今年初發現患上前列腺癌第四期，且已擴散至全身。他說︰「我喺度同大家講到嘢，真係要感謝天上嘅父親，佢非常之眷顧我，亦都憐憫同愛惜我。其實喺今年全身，點樣遍佈全身呢？就係盆骨有啲、胸骨有啲、膊頭有啲、尾龍骨又有，甚至連頭骨都有。」

泰山透露去年12月時發現小便不暢順，於是找泌尿科醫生進行檢測，醫生指其前列腺很硬，驗血後發現PSA Level（前列腺特異抗原）指數高至57，而正常的數值是4或以下。他在醫生安排下於3日內進行連串檢查，最後證實患上前列腺癌第四期，亦已擴散至骨頭。確診後，泰山立即開始荷爾蒙治療，包括打荷爾蒙針及服食鏢靶藥。由於當時是農曆年廿八，他在公眾假期後找腫瘤科醫生，並於2月初起開始額外進行6次化療、10次電療，直至6月尾完成化療及電療，7月初開始除了打針食藥，還接受中醫的腫瘤科專科治療，清除體內的殘餘癌細胞。泰山說︰「我依家嘅狀况係身體內90%癌細胞已經係走晒，驗血PSA指數係0.8 。我非常感恩可以去到呢個數字，但要繼續努力，因為我呢個情况，數值愈低會愈好。」

他在影片裏分享當初知道患上四期癌症時，有「我係咪就係咁玩完」的感覺。他說︰「當我話畀太太聽時，佢當然無法相信。我哋都呆咗，當然有喊。第一個感覺係覺得，我睇唔到我啲細路長大，唔可以同太太一齊變老。我當時非常害怕，但唔知點解，我嗰個唔能夠相信、點解我會有癌症嘅念頭好快過去，好快接受咗自己得到呢個症，之後諗我究竟應該點樣做，應該點處理之後嘅事，因為我嗰陣時諗緊已經玩完，喺度諗究竟啲小朋友讀書點呢，好擔心如果我咁樣走咗，冇人去教我啲小朋友，冇人去幫佢哋，亦都冇人照顧我太太。」

泰山感恩在化療及電療的過程中沒有太大不適︰「6次嘅化療，我一次都冇嘔過，係瘦咗少少，但後來又肥番。我係攰咗少少，但冇特別嘅痛楚，皮膚亦都冇壞之類，好感恩可以非常安穩渡過化療。電療方面，醫生、護士都同我講，我啲皮膚會好似損咗咁，沖涼嘅時候千祈唔好用番梘，因為會損，預咗會唔舒服，但係我好感恩皮膚冇爛，亦都冇真係好損。呢半年嘅治療，我過得好安穩，冇特別嘅副作用，冇特別壞嘅情况出現，非常感恩﹗ 依家化療、電療都做完，食緊中藥，開始慢慢有精神。你見我早排返番去電台，又做咗少少電視節目。其實當時情况已經好咗啲，但係因為身體畀人揼咗兩個『核彈』入去，需要長啲時間調理，依家身體嘅力量比我想像中好好多。」

他表示現在與癌細胞共存，除會繼續食藥打針及定期檢查，也要生活得更健康、做運動及注意飲食，慢慢鍛練身體。泰山最後寄語同路人︰「好似我一樣有癌症嘅朋友，其實出面有好多。好多朋友會唔知道點算，會覺得好驚，唔知點樣面對生活同屋企人，我都係一樣。依家科技真係好發達，醫療技術真係好發達，幫到你嘅醫生同藥非常之多，所以千祈唔好放棄，最緊要係保持正面嘅心情、正能量去面對呢件事﹗我由開頭唔知點算好驚，到依家得到呢一個治療嘅效果，好感恩，好似俾咗一個新生命我一樣。當然，我仲要繼續處理呢個病，繼續面對佢有機會復發，但係未發生嘅事諗嚟做咩？我依家會好正面，好正能量咁活好每一天，放鬆啲、脾氣少啲、大方啲、寬容多啲、原諒人多啲、笑多啲、陪屋企人多啲、陪小朋友多啲，畀啲耐性身邊所有嘅人，我覺得我依家好似要準備開始一次新生命，所以想同大家分享呢半年發生嘅事，鼓勵大家正面咁活出你嘅生命。有病嘅朋友唔好放棄，每日要繼續面對你要面對嘅事，因為你個腦話畀你聽唔放棄，你嘅身體都會唔放棄去醫番好自己。」

（即時娛樂）