鄭秀文張敬軒夢幻合體 11.1亞博舉行壓軸拉闊音樂會

商台今年合共舉行3場拉闊音樂會，繼5月林家謙﹑洪嘉豪和陳健安，本周六（30日）林峯﹑張繼聰及鄧麗欣開騷後，今年壓軸的拉闊音樂會，將由鄭秀文（Sammi）和張敬軒接力上演，2人將於11月1日假亞洲國際博覽館登場。

為配合今次拉闊音樂會的主題「Most Wanted」，鄭秀文（Sammi）與張敬軒特別以美國西部牛仔造型拍攝宣傳照。鄭秀文對上一次做拉闊已經是2001年，鄭秀文未演出先興奮：「二十四年後再次踏上拉闊舞台，我已經好興奮，預演緊一啲想唱嘅歌，或者想出現嘅畫面。拉闊喺製作、形式同喺紅館或者其他地方開嘅演唱會嘅感覺好唔同，尤其喺舞台上面嘅表達，絕對好唔一樣，所以我係非常期待。」

二人首度合作的音樂會，鄭秀文分享自己「Most Wanted」的拉闊畫面：「我哋都係喺生命裡面有經歷嘅人，同時擁有多面向嘅特質，好明白對方，而且軒仔畀到我好多新鮮感，我相信同佢一齊做拉闊嘅感覺會好唔一樣，演出會更有深度。成個show唔只得我，亦唔係只有軒仔，呢個係『我們』嘅show，所以我好期待呢個二人成為一體嘅show，希望到時呈現到一加一大於二呢個效果出嚟。」

軒仔與Sammi同台演出拉闊有中獎感覺：「Sammi係一個Super Star，有機會同一位Legendary Artist合作，好似中獎咁，真係成就解鎖。Sammi嘅前瞻性係我嘅Role Model，呢場拉闊音樂會絕對係Once in a Lifetime。我以前每一晚都有追《大頭綠衣鬥殭屍》，我通常都係頒獎禮或大Show先見到Sammi，離遠望，唔夠膽同佢講嘢。第一次真真正正同Sammi講嘢係做佢演唱會嘉賓，嗰時好開心、好激動。宜家我都仲有呢種緊張，因為佢喺我哋眼中永遠都係Diva。」他又期待跟Sammi跳舞表演。

據商台官方Ig寫道：「Sammi同軒公第一次攜手登上拉闊舞台，為大家帶來一夜限定嘅「時空約會」，穿越唔同時空，以音樂對話，相信將會發全城矚目、前所未有嘅拉闊火花！」不少網民留言表示：「呢個組合好正」﹑「超級期待」﹑「有冇考慮開多幾場啊？」﹑「大癲真係！！」等。

（即時娛樂）