林子祥憶童年英國悲慘生活 葉蒨文︰佢依家講都想喊

林子祥（阿Lam）近日與太太葉蒨文（Sally）接受查小欣網上節目訪問時，透露早年留學英國的悲慘生活。他回憶︰「細個喺英國冇嘢食，屋企人冇寄錢，學校踢咗我出嚟。爸爸雖然係醫生，不過佢由我哋（阿Lam與弟弟）自己去求生。」Sally補充：「我哋去英國成日坐地鐵，嚟到一個地鐵站，阿Lam就話，佢就喺呢個地鐵站被人丟低。佢一個篋、細佬一個篋，企喺個地鐵唔知點算。依家佢講嘅時候都想喊！」談到當時在英國如何生活，阿Lam表示：「乜都做，快餐店、派報紙、幫人執屋、百貨公司，搵到幾多就食晒，冇㗎啦，因為仲要租房！」

Sally向來不吃海鮮，她解釋︰「嗰陣時我爹哋煮蟹，佢放隻蟹入個鑊，隻蟹嘅眼睇住我好似叫救命，佢唔係真係叫，只係我自己諗，但我救唔到佢，佢好慘！又有一次朋友整龍蝦，龍蝦仲郁，我當場喊，我叫佢攞走，我唔得！」Sally坦言與阿Lam對飲食並不講究，去快餐店就可吃一餐。阿Lam早前被拍到在公園獨自吃燒味飯盒，阿Lam表示：「不知幾Enjoy，一啲都唔慘！我依家仲會去茶餐廳，飲奶茶、睇報紙！」

（即時娛樂）