娛圈單打︱離開大台心情靚　女神內外都咁正

女神李佳芯喺TVB最後一套劇集《麻雀樂團》話咁快播完，以後要喺公仔箱再見Ali BB，唔知係何年何月嘅事咯。佢當日為此劇剪掉長髮，可見非常重視，無奈始終不敵現實，都係要同大台說再見。

好啦，舊嘅唔去，新嘅唔嚟。Ali BB離開大台後不愁寂寞，隨即偕《BB來了》舊拍檔黎諾懿，飛到馬來西亞拍攝當地劇集，女神賣口乖大讚製作專業，拍劇之餘仲孖住黎諾懿搵真銀，接下唔少商演活動，可見失之東隅，收之桑榆。咁又係呀，TVB藝人喺當地好有市場，Ali BB話晒係視后，自然吃香。

視后亦有感而發，喺社交網撰文：「原來最重要的那關在自己，當自己那關跨過了，世上也再沒難關了。」睇嚟離開大台嘅決定，真係令佢鬆一口氣喎。跨過難關後，女神亦彷彿脫胎換骨。最近大晒靚相，即使素顏上陣，皮膚一樣吹彈得破，獲網民大讚十足十中學生咁青春。

果然人逢喜事精神爽，唔使再被雪藏問題困擾，人都靚好多。講真，世界咁大，實搵到容身之所。雖然有指Ali BB因為衰多手，佔中時期喺社交網發出倒轉國旗等相片，因而被內地網民斥為港獨，搞到被內地全面封殺，連出席台慶活動，內地平台轉播都要將佢打格仔，TVB不得不將佢掟入雪櫃；但即使冇咗內地市場，都唔等於冇路行，Ali BB就話畀大家知，天無絕人之路！

好似前輩宣萱吖，自爆北上拍劇經常腸胃不適，直言並不享受，經理人則教佢攞疊銀紙出嚟數，咁樣心理就會平衡番。總之，任何事情有得總有失，最緊要有得揀啫！

東網網站 : https://on.cc/東網Facebook專頁 : https://www.facebook.com/onccnews/