邀張柏芝做個唱嘉賓 林家謙自肥成功嗌好癲 柏芝活在當下

林家謙紅館演唱會昨晚（30日）第9場嘉賓，請來久違香港舞台的張柏芝。2人先合唱《任何天氣》，林家謙表現緊張，他還自己打自己一下，並笑說：「好癲呢件事，我醒未？好開心，真係唔知點講，從何說起？你好耐冇出嚟見大家，包括我都非常興奮。」柏芝說：「我好耐冇唱《任何天氣》，自己新人18歲喺紅館嗰陣都唱過，我好緊張。」

林家謙叫工作人員拿出柏芝CD：「你係我第一個買唱片嘅歌手，嗰隻碟叫《Destination》，之後《不一樣的我》嘛，你可唔可以同我簽個名呀？」現場起哄家謙再次成功自肥。家謙再說：「《不一樣的我》係我當年成日拎嚟做參賽歌曲㗎，嗰陣我重未轉聲，唱你個Key，霎眼間，我就已經轉咗聲，好神奇呀呢件事。」

柏芝讚家謙好乖﹑好純及好有才華，當她接到被邀請做嘉賓時，就想自己雖然出了很多唱片，但懂她的歌的人不多：「我紅得一首歌……」家謙說：「唔係囉，《一直掛念》，跟住《不一樣的我》，《棉胎》 ，大家都識你好多歌，你講嘅嘢唔成立呀﹗」

柏芝再說：「有一首歌，係我新人時，好堅持要唱，唔係我自己嘅。公司打嚟話有機會喺紅館表演，我就想唱呢首歌，我希望每一分每一秒，都珍惜身邊所有嘢，好多嘢都唔係必然，我哋應該要活在當下同開心，珍惜所有自己愛嘅人，我選擇呢首歌，亦係感恩可以喺紅館同大家一齊唱，我都好開心嘅。呢首歌叫《留給最愛的說話》，可能好多後生仔唔係好識，不過可能跟我差唔多年紀嘅可能會識 。」家謙說：「我後生，我都識喎，所以你講嘅嘢係唔成立，我係後生仔，我識 ，所以好多後生仔都識。」

2人合唱《留給最愛的說話》時，在讀白部份，家謙突然改對白：「終於我鼓起咗最大嘅勇氣，請你做嘉賓，因為我想面對住你講出我心裏面，想講咗好耐嘅說話。可惜嗰個落雨晚上，嗰條濕滑嘅公路，嗰個粗心大意嘅司機，令我差啲趕唔到嚟紅館，講一聲：多謝你。」觀眾聽到之後，笑聲不斷，令柏芝更加緊張，直指自己聲都震了。

昨晚家謙在360吊車上，突然開Ig Live，同步給未能到場歌迷一同歡樂，讓網上歌迷非常開心，更笑指他是 「返工玩電話系列！」又大讚他近鏡依然「皮膚好靚」，更有網民表示來自英國及加拿大等不同地方，驚喜可以同步看到他紅館演出。

（即時娛樂）