張學友完成324場巡唱自嘲失業　駁斥欠債傳聞：財仔電話都唔識

「歌神」張學友近年密密開騷，昨晚（24日）於紅館完成《60+巡迴演唱會》第324場演出，橫跨數年的巡唱正式告一段落，他在完騷演唱會上搞笑稱為即將「失業」感心情複雜， 亦透露不想休息太久，並透露下一個計劃是籌備製作音樂劇。

歌神縱橫樂壇40年，不斷更新個人演唱會場次紀錄，昨晚舉行尾場，吸引多位圈中好友齊來捧場，包括鍾鎮濤、范姜、曾志偉、庾澄慶、上山詩納、鄧麗欣、余安安、張家輝、劉偉強、葉童、邱淑貞、沈嘉偉、狄波拉等，場面熱鬧。雖然巡迴演唱會暫告一段落，張學友在台上向歌迷預告「好快再返工」：「結束後大家要好努力搵錢，因為我好快開下次。」獲台下歌迷報以歡呼聲。

張學友在演唱會上解釋，堅持開騷全為證明「60」不是一個恐怖的數字，他在完騷記者會上續表示目前已經沒有太多物欲，只有繼續工作的欲望，又開心分享正籌備音樂劇，預計兩年後上台，被問到網民關心歌神是否因為欠債才不停工作，張學友無奈回應：「首先我都講咗㗎啦，其實我好慳嘅，亦都有儲錢嘅習慣，解釋得就佢哋（網民）就覺得我喺度掩飾啦，但我的而且確係冇借錢嘅習慣，就算嗰啲財仔嘅電話都唔識。我唔出嚟就冇事㗎啦，出嚟就會有呢啲嗰啲講㗎啦，我亦阻止唔到，而家嘅網絡太快太多，太無辦法控制啦，咁我哋做呢行都要知啦。」

另外網民期望見到四大天王同場演出，張學友則明言無意再合體：「你想唔想見到全部老晒嘅四大天王？個名只係一個時代，過咗之後仲邊有四大天王呢件事啫，大家都係分開晒發展，其實我哋自己冇叫自己做四大天王，我寧願希望留喺一個美麗嘅感覺。」至於有網民發現歌神手掌發黃，引發歌迷關注他的健康，張學友則指應是拜神香殘留在手心所致，感謝歌迷關心。