游學修狙擊ViuTV源於重視‎　獲前輩提點後放棄「地鳴」

日前（1月28日）Tyson Yoshi新歌「1994 前傳」〈追 CHASING THE WIND〉舉行微電影首映禮，獲不少圈中好友撐場，當中包括主演的張文傑（German）、游學修及林子峰（Stone）等，席間游學修接受電子傳媒圍訪時，除談到拍攝花絮，亦有回應有份參與的電影《送院途中》被金像獎DQ一事。不過ViuTV同系的Viu1娛樂頻道沒有跟游學修進行訪問，即使是花絮片段都被裁走，社交平台上亦只標註其他演員，疑因此令游學修不滿，在個人IG連出幾個限時動態，包括將Viu1的帖文「倒轉」分享。其後游學修在社交平台以各種方式表達不滿，不過一日後他態度轉變，出帖文寫道：「攰了，唔玩了，本來已經完全放低呢啲嘢，祝你哋咁多位以後一帆風順。」

昨晚（2月2日）游學修代替YouTube頻道JFFT、正在休假的的床哥開直播，高峰期吸引3萬多名觀眾觀看。阿修最初以《進擊的巨人》主角艾倫表達自己心境：「我依家心路歷程伴隨劇情，同艾倫一樣商討緊係咪發動地鳴（毀滅世界級攻擊手段），係咪要做咁多嘢對大家都唔好，但總之暴力就係唔啱啦。」阿修表明「今晚冇『地鳴』，唔會開戰，想聽開戰嘅就可以走先。」

游學修之後跟隨心事台慣例，用黑畫面加變聲扮「神秘人」開腔回應事件，「知大家都錫阿修。始終呢個電視台係佢重視嘅地方，所以呢幾日佢有啲唔開心，但佢話有樣嘢好重要，佢仲未好似而家咁風靡萬人、名成利就、受萬人擁愛，仲係一個醜小子，呢個電視台已經畀機會佢。佢成日話自己喺2015、2016嘅時候，佢覺得自己醜樣、好幼嫩、同埋成日失言，但呢個時候，有個電視台畀機會佢拍開台劇《綠豆》、之後拍埋《三一如三》。」他拍攝《三一如三》時認識廚師Christian Yang楊尚友，對方將他引薦給其他ViuTV同事，使他之後有機會開拍20集自編自導自演的《仇老爺爺》。

游學修以「神秘人」身分繼續表示：「當時ViuTV畀咗機會阿修拍佢嘅第一套劇，阿修當時冇拍過電影、冇拍過電視、冇自己channel，大家都質疑佢做唔做到，但呢個電視台畀機會佢拍成廿集嘅作品。依家佢都仲口響響拍嘢，但其實都未超越到呢個劇集。」游學修指當日給自己機會的前輩，在疑似封殺事件後致電關心：「佢話有啲誤會喺入面，所以修仔覺得不如唔好地鳴，修仔想同大家講嘅係，搞咁多嘢都只係想『𢯎』撈啫，只要有機會就想捉住。所以既然呢位前輩有呢個溝通後，修仔都想為自己講過嘅嘢，令身邊擔心佢嘅人唔使驚，阿修喺大廳。你哋唔好再鬧喇，如果為咗修仔好，記住佢都係想『𢯎』撈㗎。」

然後游學修以正聲說道：「身邊好多人都擔心我，有人喺threads關注我精神健康。呢兩年嚟自己都成長咗，知分寸喺邊，有冇唔開心？係有唔開心。呢位前輩同我通咗電話，真係由我當日拍電視劇開始，佢絕對冇任何需要畀機會我嘅情況下，畀機會我演出，亦畀機會我拍咗我第一部電視劇《仇老爺爺》，呢位前輩我好重視，之後試當真開騷、搞舞台劇我都有邀請呢位前輩嚟睇，我好重視自己嘅『根』，好需要歸屬感，喺JFFT、試當真都好，HOY TV話搵我做訪問我都好多謝HOY TV，我自己好重視呢啲嘢，我會記得，前輩有呢啲關心好足夠。」最後他希望支持者停止攻擊：「希望盡快喺黃Viu嘅訪問度見到大家。」