回顧2025年的ViuTV 唔少出色作品帶來豐富一年
2025年的ViuTV
ViuTV走到第九個年頭，繼續製作出唔少出色嘅作品，帶來豐富一年，嚟緊會喺到幫大家總結一下，再講啲我嘅感受。
劇集
全年總共有十套原創劇，每套我都有睇，先簡單介紹：
《無用的謊言》圍繞一單謀殺案，沉重以外加入唔少輕鬆搞笑情節，愛情線青春甜蜜，係一套成功嘅改編偶像劇；《老是常出現》講出一間另類老人院嘅故事，兩代人嘅衝突、老人家們嘅互動都勁搞笑，估唔到依班由細睇到大嘅演員可以咁鬼馬；《弊傢伙！我要去祓魔》設定特別，有啲cult味，劇情驚喜又精彩，三位主角純粹嘅情誼更令人動容。
《三命》由大師級班底製作，年輕時一個小小嘅選擇差異，卻走出三條經歷截然不同嘅故事線，充分感受到命運嘅無奈同無常；《麻甩媽咪》除咗男兒心女兒身嘅搞笑，仲比兩位主角用另一種方式同各自嘅家人相處，溫馨感人；《哪一天我們會紅》將網絡生態演繹得出神入化，抽水得嚟又有反思帶出，娛樂性十足，有笑有淚，絕對稱得上係神劇；《光明大押》以當鋪為題，講述每件抵押品背後嘅故事，生意以外更多係人情味。
《社畜再培訓先導計劃》講一班大公司職員重返小學嘅趣事，同班小朋友互動過癮，仲建立出真摯嘅感情，得到職場無法學習嘅知識；《翻盤下半場》由爸爸同兒子一齊破產，陷入家庭危機開展。一個中年男人由零開始為生活奮鬥，縱使面對諸多挫折，但過程係有份熱血同溫暖；《存酒人》用還酒揭開一個個充滿感情嘅故事，陣容強勁，演員演繹出色，拍得好有感覺。
ViuTV 2025年劇集質素非常高，題材同風格多元化，演員選擇亦充滿新鮮感，就算用重複嘅演員，佢地做嘅角色都相當唔同。上半年係keep住有劇追，十套劇中得《光明大押》比較差，節奏同剪接都唔得，其他絕對係水準以上嘅作品，做到貴精不貴多。相信有唔少劇放喺早幾年播，已經引嚟全城熱話。
一小時綜藝
平日黃金時段我睇曬嘅有三套。《足球女將》揮灑熱血，一班女仔由零開始接觸足球，過程艱辛但佢地堅持到底，最後仲踢得有板有眼；《膠戰S4》保持過往水準，六膠化學作用依舊，集集由頭笑到尾，十一集完全唔夠喉；《全民造星VI》有眾多潛力實力兼備嘅參賽者，表演水準非常高，仲睇到佢地顯著嘅成長，決賽更稱得上係歷年最精彩。可惜反應不如以往，如果再有下屆相信要搞啲新意思。
而週末綜藝嘅《Chill Club》2025繼續邀請唔少外國單位合作，到下半年以歌手做主題，每集好似一場小型演唱會。做咗咁多年都keep住搞新意思，值得欣賞；《P1X3L 5G上位計劃》企劃有趣，整個團隊相當有火花，唔會有邊個太搶鏡，夾出嚟就係搞笑好睇，希望未來有重組嘅機會。
半小時綜藝
2025主力係旅遊節目同偶像擔正嘅綜藝，我只係睇曬《COLLAR以為去度假》，仲有Mirror十二子以小組形式擔正嘅三個節目，包括《呂濤米Lo 花Son Show》、《夜粥先生幾多點》同《四鏡大暴走》。依幾個節目睇到更多偶像們私下嘅性格，仲有成員之間嘅搞笑互動，將偶像同觀眾嘅距離拉近。
同劇集一樣，依啲綜藝製作上係幾唔錯，雖然略嫌少咗啲創新元素，但仍舊有追看性，睇下2026會唔會有多啲令我驚喜嘅綜藝！
小結
嚟到2025年，Viu各樣節目嘅質素繼續穩定地進步，製作更成熟，無咩難睇嘅劇集同綜藝。可惜觀眾無咗當年嘅新鮮感，亦有更多娛樂選擇，加上偶像效應稍退，因此唔會好似疫情時期受到咁多關注。縱使依然有一批觀眾，但吸街客嘅能力明顯下降，就算係偶像們嘅粉絲，佢地都未必會留意其他節目。始終早幾年爆紅得太快，相比之下依家係會顯得有點弱勢。
挑戰與競爭
其實我一直認為ViuTV主要競爭者並唔係TVB，而係YouTube、Netflix等等嘅網絡平台。
TVB所謂嘅慣性收視太強，佢地唔需要創新，打安全牌，做返合格水平左右嘅節目，已經足夠鞏固自己嘅觀眾群，而依班觀眾本身就唔太會睇ViuTV。因此，近年你見到TVB嘅節目題材、藝人、拍攝都非常公式化，好似《中年好聲音》用同一個模式，三年搞足四季，依然做到佢地嘅招牌。我會話相對年輕嘅觀眾，係好難喺依個台搵到啱睇嘅節目，有機會再講多啲。
相反，ViuTV嘅節目種類闊好多，target曬唔同口味嘅觀眾，好處當然係觀眾群夠廣，但同時流動性亦非常高，佢地唔會準時開電視，睇咗套劇一節覺得悶就唔再睇，但佢地亦會因為一條reels、一個threads而睇你嘅節目。因此，唯有不斷創新，keep住質素，用返當年underdog嘅心態，做好每一集，用時間去累積口碑，慢慢就會吸引到更多觀眾喜歡。今日佢地得閒就開個Netflix嚟睇，他日可能就係開ViuTV。
邁步向前
想當年我第一篇寫嘅文就係講2020年嘅ViuTV，當時Viu只係偶有佳作，剛剛嶄露頭角。轉眼間五年過去，依個台嘅轉變同高低大家有目共睹，縱使依然有唔少不足，但佢確實提供咗一個平台，比一班有熱誠嘅創作者同藝人發揮所長，所以同五年前一樣，我係好鐘意睇依個電視台。
適逢ViuTV喺2026踏入十周年，我今年其中一個目標，就係寫幾篇總結依十年嘅文章，希望會做到！
▼Follow hkpopculturelover
Instagram: https://www.instagram.com/hkpopculturelover/