丁子朗進軍樂壇 首支單曲《Sunset Lovers》正式面世 好友余宗遙推做「下一個林峯」

藝人丁子朗（丁丁）和好友余宗遙（DEZ）昨日（19日）到新城廣播接受程凱欣和麥卓華主持的《原來生活好快樂》訪問，正式成為今年樂壇新人的丁丁，宣傳新歌《Sunset Lovers》，歌曲由DEZ一手包辦作曲、編曲和監製，他大讚丁丁：「佢前後錄咗三次，一次比一次進步，成個人唔同晒；我哋係朋友係，佢出歌我真係義不容辭。」

丁丁和DEZ的緣份，源於兩人去年一同參加內地一個選秀綜藝節目，當他認識DEZ後，發現對方的音樂造詣非常厲害，就連對方聽的音樂，亦顛覆了他的想象。問丁丁加入樂壇是計劃已久還是忽發奇想？他稱兩者皆是：「唱歌一直係我心願，每次喺K房唱K，心諗可以喺Ｋ房唱自己首歌都幾好，奈何當時我嘅歌喉未夠、人脈未夠，亦冇咁嘅資源畀我咁做，慢慢做耐咗，參加比賽識多咗唔同嘅人，覺得自己有信心，不如就做。」

至於想走什麼風格？丁丁表示：「我好鍾意Lofi Pop，覺得好有型、好舒服，聽嘅時候耳朵會有懷孕的感覺，不如就出首Lofi Pop的歌。」DEZ認為Lofi Pop不貼合丁丁人設，不過丁丁卻指這年代很多人都是「斜槓族」，他覺得問題不大，還表示：「想做乜就做乜，但有時會迷失自己，觀眾會唔會接受？所以DEZ係一個好好嘅明燈，佢會話我聽可以做自己，但要考慮市場，大家會點睇你，因為你已經唔係新人。」

入行8年的丁丁，形容自己是藝術家性格，喜歡唱歌、畫畫和演戲，充滿表演慾，就連父母亦覺得他是做演員的材料；至於DEZ則表示從來沒有視現在的工作為「這一行」，純粹只做自己喜歡做的事，他又稱：「我個人比較內向，有啲位表達唔太清楚，所以呢啲嘢要學。」

提到最新目標，丁丁直言最希望拿到年尾頒獎禮入場券，他說：「喺頒獎禮台上企吓都好，未必想拎獎，但可以喺台上同大家say個Hi，同大家介紹我係今年新人。因為我覺得呢個係每年一個成績表，話畀大家聽你仲喺呢行，尤其頒獎禮上影大合照，邊個企前企後，我都會留意呢啲，如果下年有一席位都幾好。」DEZ向丁丁表示：「快啲做下一個林峯！」丁丁聞言笑住表示：「幾好，林峯係個典範，佢拍劇好出色，有好多耳熟能詳嘅歌，又接埋電影，係我目標！」

圖片：新城廣播