卡塔爾特集：沙漠飊車 內海日落

卡塔爾世界盃日記 倒數1日

今日趁球賽仲未揭幕，參加咗一個沙漠之旅local tour。昨晚七八點先至網上報名，果然冇問題，越野車準時駛到入嚟球迷村接載，揸車嘅係個阿拉伯人，同車仲有兩個美國遊客。我哋上車後一路南下，冇幾耐已經上咗高速公路，展開咗呢次Desert Safari。兩旁都係有少許植物嘅荒漠地帶，原來城市同不毛之地可以相距咁近。

大約半個鐘車程，去到真正一望無際、沙粒幼細嘅沙漠，而今次旅程嘅第一個節目就係騎駱駝。我哋之前喺敦煌已經騎過，不過一場嚟到，當然要騎下啦，每人要另加100卡塔爾幣（約200蚊港紙），個團唔包，咁嘅價錢只騎15分鐘就有啲掠水。

騎駱駝最驚心係騎咗上去之後，隻駱駝趷起身嗰一刻，成個人會舂向前，真係心都離一離㗎，到駱駝企直之後就會騎得好平穩，可以盡情享受沿路大漠風光，而落斜時就要將重心靠後，令個人垂直而唔係傾前。

騎完駱駝繼續行程，越野車喺沙丘起伏之間開行馬力前進，簡直chok過劉華，阿拉伯司機手車真係唔簡單，所以參加呢個團之前最好咪食咁飽。仲有切記繫上安全帶，因為chok得勁時個頭會撞向車頂，冇條帶幫幫隨時整傷頸。司機嫌我哋尖叫聲不夠，再刺激啲，專登喺好斜嘅沙丘度俯衝落去，成車人頓時嘩聲四起。

飆車之後，一行人去到沙丘高處玩滑沙，坐喺塊板度瀡落去。港婦平衡力較差，衝到半路已經跌低，碌幾個圈先停下來。放心，安全嘅，不過食下沙就難免。兩個美國人比較膽大，企喺塊板上面以滑雪姿態滑落去，一個做得非常完美，一個就一仆一碌。

下一站去到海邊睇日落，你冇聽錯，沙漠都有海邊，個海叫做內海（Inland Sea），深入沙漠腹地，當汪洋遇上大漠，半邊碧水半邊黃沙，連聯合國教科文組織都將呢處形容為非凡景觀，而海嘅另一端就係沙特阿拉伯。

沙漠、海洋加夕陽，形成世所罕見嘅絕景。

行程結束之後，晚上我哋去到第一日開放嘅Fan Festival，入口處人山人海，排隊入場等咗個半鐘，而且一度發生混亂，有群眾鼓譟同不斷擠向前，我哋都格外留神，安全至上。

呢度相信係世界盃期間多哈唯一有酒賣嘅戶外地方（天價私人派對除外），因為卡塔爾食言，突然宣佈禁止比賽場館賣酒。一杯啤酒索價50卡塔爾幣，超過100港元，認真揦脷。現場有音樂表演同各式遊戲，到球賽開鑼就有賽事直播，相當熱鬧。

離開時因最近嘅Corniche地鐵站只出不進，要行近半小時去到West Bay站，嗰度即係中環，商廈林立，世盃當前，大廈外牆都貼出巨型球星肖像，配合成個多哈呢場大party。

By港佬