古天樂受訪談近日受感觸　「睇張相突然眼淚流出嚟」

《尋秦記》兩位主演古天樂、林峯近日接受彭秀慧（KP）主持的ViuTV節目《晚吹 - Chat KP》訪問。KP提到《尋秦記》中兩位主角在碼頭離別流淚一幕令人難忘，林峯指拍攝順利兩take搞掂：「其實嗰場戲好順利，好真情流露，好自然就演到出嚟，個心情好似係儲咗20幾年呢個角色嘅內心世界，好澎湃，個角色本身個基礎好豐富，所以拍得好順利。」

今集話題為「男兒淚」，KP問及兩位「現實生活中最近一次喊」的經歷。古天樂分享對上一次喊是拍攝前的前兩個禮拜：「嗰日我媽生日，同我媽食飯，咁影咗張相，影完之後我望住張相望咗好耐，我覺得我好少post我屋企人啲相出去，上一張應該有成十幾年前都有，望住張相就覺得，咩叫珍惜眼前人。呢幾年無論係疫情定戰亂，突然間個世界好似變得好緊要，但點變都好，唔識珍惜眼前人係一個好大嘅問題，呢部戲都有講『過去嘅嘢我地無辦法改變，但眼前嚟緊嘅嘢我地可以珍惜』，睇吓睇吓張相就突然有啲眼淚流出嚟。」

林峯分享對上一次喊是幾個月前想起家人，不過前陣子到台灣宣傳電影的日子亦令他感慨萬分，他表示自己未試過去台灣謝票：「可能咁多年嚟，其實有好多各地支持我作品或音樂嘅人，佢哋會嚟睇我演唱會，但我終於去到佢哋嘅城市，見到佢哋咁多年，可能講緊二十年以上嘅嗰份支持，我會諗返起，我個演藝事業嘅原動力都係源自佢哋。」KP問：「咁你開演唱會都好感動㗎？」林峯回應做歌手和演員的感動方式有別：「歌手可能舞台上可以直接面對到觀眾，演員拍嘢都係同同事匿埋一齊，唯一可以同觀眾接觸就係謝票，所以係好感動。」

另外，《尋秦記》今日（2月5日）宣佈即將推出加長版並正式命名為「Plus+ 多元宇宙版」。電影自2025年12月31日上映至今一個多月，港澳累積票房已突破8,700萬港元，登上歷年香港電影港澳票房第四位。由2月6日至2月10日一連五天，觀眾凡於香港戲院購買《尋秦記》電影戲票，即有機會獲得《尋秦記》Plus+ 多元宇宙版半價優惠券一張，名額共1萬張。當《尋秦記》Plus+ 多元宇宙版正式上映時，觀眾憑該券於香港戲院購買《尋秦記》Plus+ 多元宇宙版戲票，即可以半價購買一張正價戲票。