雲浩影化身專員 聆聽粉絲心事

雲浩影（Cloud）日前為宣傳新歌《你的損失》，在銅鑼灣行人專用區設置紅色懷舊電話亭，自己則化身「心事聆聽專員」，透過電話專線聆聽「迷雲黨」（歌迷暱稱）的心事。她坐在電話亭外的枱櫈前，寫下專屬密語在小卡上，為粉絲打打氣。活動吸引不少途人圍觀，非常熱鬧。

Cloud自言不是專業感情專家，最擅長解答青春期煩惱。她說︰「今日喺度聽啲朋友仔傾訴，聽吓佢哋嘅煩惱，聽到好多唔同嘅故事，係『心事台』。有啲係愛情煩惱，講暗戀、情侶間相處等；父母想知點樣同子女相處；關於友情就例如就嚟畢業，友情點樣維繫。」

Cloud細心聆聽後，然後給予意見。她說：「我都鍾意畀意見，因為好多人問我嘢，都係想知我嘅角度點睇。畀完意見，我都會戴番個頭盔，始終情况真󠄉實係點，只有你自己知，我嘅意見只用作參考。」

每次Cloud推出新歌，都會收到很多留言。她表示：「有朋友仔會話我知，佢哋都身同感受（感同身受），首歌好鼓勵到佢哋，亦都好多人搵我傾心事，聽到好多故事，今次可以直接回應到大家。」她自言最擅長解答11至25歲青少年的煩惱，並回憶自己在青春期有煩惱時，就向父母和身邊的好朋友傾訴，試過聊通宵電話。

Cloud說：「平時我唔係『樹窿』，反而經理人係我嘅『樹窿』，我喺佢哋身上學到好多諗嘢嘅方法，有時只要轉一轉念，就可能成件事唔同咗。」談到她曾於宣傳歌曲時在行人專用區沉浸式看書，今次就變成講電話，Cloud笑言下次想嘗試在鬧市中間睡覺、煮飯、開餐等「生活化」行為。

（即時娛樂）