關智斌公開凍齡秘訣 抱小飛俠心態面對人生

44歲關智斌（Kenny）日前接受TVB娛樂新聞台《StarTalk》許文軒（Edmond）專訪，大談相隔4年多再推出廣東新歌及開騷感受。Kenny說：「隔咗咁耐冇出廣東歌，非常抱歉，記得4年幾前出完《隱形人》之後去咗內地拍攝節目，當時因為疫情，唔係隨時可以返香港，冇理由出咗首歌又唔去做宣傳。呢幾年心態變咗，以前淨係識唱歌，唱完就算。呢幾年因為做咗內地節目，亦做巡迴演唱會，發覺自己好想做一個表演舞台，喺演唱會上結合跳舞、唱歌、演戲等舞台元素，於是自己就開始萌生咗一個『小飛俠』嘅音樂企劃。直到上年年尾決定做一份計劃書，整埋成份PowerPoint畀公司高層睇，畀佢哋清楚知道我心目中想創作嘅故事，希望做一系列有關『小飛俠』嘅歌曲同舞台，成件事真係好有誠意，最後出咗《永遠的彼得潘》，成個企劃由呢一首歌開始。」

談到與小飛俠性格相似時，Kenny說：「其實好多人都話我似小飛俠，首先啲人話我唔識老，覺得自己凍齡？睇吓同邊個比，如果同自己同學嘅話就係，如果同我同公司嘅歌手好似容祖兒、蔡卓妍、謝霆鋒嘅話，佢哋全部出道到依家都冇變。如何保持凍齡？ 講笑就話晚晚打針，其實我覺得心態好重要，我覺得自己有小飛俠樂觀面對世界嘅態度，好似我喺谷底嘅時候，都冇日日意志消沉，怨天怨地，自己一定會搵嘢去做。我好鍾意做乜就去做乜，唔理其他人點睇，好似呢個年紀走去學滑雪同攀石，出面啲人都笑我，小心整親，手腳唔再係有20歲嗰時嘅耐力，我覺得咁樣身心先至會保持到。」

新歌由林若寧填詞，Kenny 說：「依家唱歌會研究埋歌詞，有問題會同填詞人提出，今次就覺得呢首歌有句歌詞好似冇貼近依家嘅小朋友，雖然林若寧有解釋番畀我聽，不過可能佢想安撫我，所以就改咗唔同嘅字眼。點知去到錄音嘅時候，自己唱唱吓又覺得林若寧嘅解釋，原來又好啱數，於是自己就唱番最初嘅版本，可能佢心諗一早咪話咗你囉！」

（即時娛樂）