JACE 陳凱詠《PTSD》　心酸地道出分離後之掙扎與憂傷

喺今年幾首風格特別嘅作品後，Jace再次演繹抒情作《PTSD》，心酸地道出分離後之掙扎與憂傷。

「何事落淚不止反覆閃現前事閒事無聊查看一早禁止」

當一段關係完結，總要經過艱辛嘅move on旅程，終日與情緒交戰，徹夜難眠，花盡力氣先能夠走出陰霾。

「你送給我PTSD 間中會極度怕事持續墮入惡夢驚醒過太多次時空也錯亂沒有終結」

隨時日過去，傷口已彷似被療癒得再看不見，但留下嘅恐懼其實仍埋在內心深處，往往喺不經意嘅瞬間被勾起。可能係見到一樣有回憶嘅物品，可能係置身曾經相處嘅環境，甚至只係再次接觸愛情，當時嘅感受都會再次浮現。

「難得識穿騙子難得一走了之難得肯正視我仍難以為明日刪走往事」

明明我咁辛苦先可以離開你，點解偏偏無法忘記以往嘅記憶？

再次沉溺喺負面情緒中，難以抽離，好似永遠都擺脫唔到對方留低嘅恐懼，更害怕踏入一段新關係，害怕會再受重傷。

「難保新開始再沒類似瀕死狀況我不敢再試極難再救治」

愛情從來都係一把雙面刃，擁有時係全世界最幸福嘅人，失去時世界彷彿一下子倒塌。

其實過去嘅經歷是甜蜜是痛苦，我地已無法改變，但無論如何都係成長重要嘅部分，塑造出現在嘅你。與其強迫自己抗衡恐懼，倒不如嘗試同依份PTSD共處，接受你係一個有血有肉嘅人。情緒出來時就好好抒發，傷心係無問題㗎。

「從前事已令我慘痛極致仍纏住我像個死結」

《PTSD》演繹溫柔又充滿感情，睇埋MV會有種淡淡嘅傷感，最後呼應《四月物語》更令人動容。

「我仍何以未痊癒心驚膽顫潛伏記憶能否遏止隱患和我在僵持」

Jace今年繼續作出不同嘗試，令人眼前一亮，好似《大車BIG CARS》係一首破格又正到癲嘅作品。而佢唱抒情歌嗰陣，又總可以觸碰到你心靈脆弱嘅一面，陳凱詠就係咁有特色嘅歌手。

雖然近排有聲音話佢嘅歌走得太偏，但我認為Jace成功為廣東歌帶嚟一點新衝擊，作品質素亦非常唔錯。期待佢會再帶到咩驚喜比大家！

「多得這種可怕內心創傷愛得一次」

如果你依刻仍然被往事纏繞，請緊記你已經非常勇敢🫂

《PTSD》JACE 陳凱詠
曲：KW朱敏希
詞：亞木 / KW朱敏希
編：蘇道哲 / AF
監：AF

「難堪不想你知
情緒再三透支
難保新開始再沒類似
瀕死狀況我不敢再試
病態怎根治
陰影揮之不去滴血不止
拒絕傷多次

多得這種可怕內心創傷
愛得一次」

娛樂