宏福苑火災｜限上樓三小時　卓永興：四人上去等於 12 個鐘　災民斥偷換概念：一家三口瞓八個鐘，係咪等於佢瞓咗全日？

政府昨午（28日）公布，將在 4 月 20 日至 5 月 4 日，讓宏福苑居民分批重返七座受大火波及大廈單位，取回個人物品，具體安排包括每戶只限返回單位一次取物三小時、因應單位受損程度最多限四人入內等。政務副司長卓永興今早（29日）於電台節目說：「告別我諗就唔需要太長時間」。他又說：「如果你四個人上去，有三個鐘，咁其實等於有 12 個鐘，你咁乘落去嘅話，有 12 個鐘去做嘢。」
卓永興的「四人等於 12 個鐘」論，引起災民不滿。有受訪災民質疑，火災至今超過四個月，勘察、搜證工作經歷上百日，為何不能容讓居民有更多時間返回單位取物，斥有關說法「偷換概念」，「一家三口瞓八個鐘，係咪等於佢瞓咗全日？」居民又關注，單位物品之後會如何處理，「我屋企啲嘢點先，係咪又未經我同意就搵其他人上樓，執走晒啲嘢先？」

卓永興：災民應對物品位置「心中有數」

卓永興昨午公布上樓安排指，燒毀程度嚴重的宏新閣，會在 4 月 20 日至 4 月 22 日最先開放，其後宏昌閣、宏仁閣、宏道閣會在 4 月 23 日至 4 月 28 日先後開放；最後一輪 4 月 29 日至 5 月 4 日，為宏泰閣、宏建閣、宏盛閣。每戶只限返回單位一次取物三小時、視乎單位受損程度，最多限四人入內、嚴重受損如天花墜落的單位，只容一人上樓，料整個行動需時 15 日。

「上去之前，去咗廁所先」
被問到為何限時三小時，卓昨日指，如再給多些時間，「一日可執六個鐘」，意味上樓安排需時會長一倍，他認為，在 15 日內完成上樓過程，即使隊尾也僅是首批居民上樓後約 10 天，時間上相對合理。

卓今早出席商業電台《政經星期六》再指，有關安排最大目的，源於收到很多居民反映，希望返回單位告別，已預期居民上樓時會作逗留、懷緬，「甚至乎，講真我哋預咗，如果有死難者涉及單位，居民會做簡單悼念儀式」，但為安全，叮囑居民「唔好生火」，不要化寶。至於收拾財物、具紀念價值物品，卓永興說，災民對物品位置「應該心中有數」。他又提醒，「上去之前，一定要去咗廁所先」，「嗰度係冇廁所，可能仲有個浴室，但係冇沖廁水，有個衞生問題」。17 組單位嚴重損毀，只能讓一人入內，約 300 個單位只能給兩人內進。卓永興補充，八成單位可四人入內。

「告別我諗就唔需要太長時間」

對於時間安排，卓永興於節目稱「告別我諗就唔需要太長時間」。他又說：「如果你四個人上去，有三個鐘，咁其實等於有 12 個鐘，你咁乘落去嘅話，有 12 個鐘去做嘢。」他另交代人數細節指，限一人進入的單位，不等於只限一人上樓，兩者是分開計算，即可以四人一同上樓，但進入損毀嚴重單位時，只可一人入內，業主也可安排工人陪同；至於災民如認為一次機會不足，可個別反映，屆時會再作考慮。

卓永興的「解說」，有居民似乎不收貨。過去曾經受訪、三位家人與外傭不幸罹難的宏泰閣居民 Jack（化名）質疑，火災至今超過四個月，勘察、搜證工作經歷上百日，為何不能容讓居民有相應時間，返回單位取物？以他一家為例，只有一個上午可重返家園，「政府憑咩認為我上一次，就能夠有足夠時間攞返我住左 40 年嘅嘢？」

對於卓永興的「四個人上樓有12小時」論，Jack 斥卓「偷換概念」，「一家三口瞓八個鐘，係咪等於佢瞓咗全日？」

「聽證會有講有好多單位根本無事」

他批評，獨立委員會首日已公布七幢大廈受毀情況，如果政府有意聽取居民意願，為何不是經合安召開業主大會討論，「點解乜都一言堂？」Jack 指，如今做法是本末倒置，「聽證會入邊都有講有好多單位根本無事、有好多單位根本冇燒過，咁政府憑乜野可以講限制我地返屋企既次數先！」他關注如果只能上樓一次，「我屋企啲嘢點先？係咪又未經我同意就搵其他人上樓，執走晒啲嘢先？根本就唔應該得一次返宏福苑嘅機會。」

同樣居於宏泰閣的黃太則提到，政府昨公布安排時，曾表示一戶一社工已收到資訊，災民可向跟進社工查詢，但其負責社工根本未收到確切資訊。一家四口居於單位的她，也關注入屋安排問題。她指，即使每人揹著大背囊，但只能一次性出入，相信可取物品有限，「真係要執嘢嘅，都要時間搵返出嚟，乜嘢叫『四個人3個鐘』就有12個鐘？」，「就算冇嘢攞，淨係望，嗰間係自己屋企，喺入面留多12日都嫌太少。」

只有一單位嚴重損毀宏建閣　宏建閣居民望取回電器

陳小姐的父母是宏建閣第一手業主，居於宏福苑逾 40 年，單位於 2024 年才剛完成裝修。聽證會披露，宏建閣只有一個單位受較嚴重損毀，陳小姐母親盼能回家取回衫褲鞋襪及新家電，如流動冷氣機、洗碗碟機、浴室寶、洗衣機。父母居於宏建閣低層，陳小姐預計將和母親二人、加上兩名搬運工上樓，但批評只有三個小時、只能出入一次根本不夠：「得三個鐘頭攞得啲乜嘢？你平時屋企執屋都唔止執三個鐘頭啦，三個鐘頭邊度夠時間？」

就卓永興的四個人上樓有 12 小時論，陳小姐批評「𢭃咁多人工講啲咁嘅嘢，係呀，我哋每人喺度聽佢講廢話，已經浪費咗我哋幾百個鐘囉！」。就卓永興稱是次上樓不是普通搬屋、不能搬走大量物品，她亦不滿：「屋企所有家品、電器、衫褲鞋襪、手袋，全部都係爸爸媽媽好辛苦返工賺錢，一件一件買返嚟，我哋唔似得啲高官，一嚟到就已經咁高薪厚職⋯咁我哋珍惜屋企嘅嘢，我哋搬返走，係咪合情合理先？」

盼當局能加長上樓時間

陳小姐盼當局能加長上樓時間、及容許能出入多於一次。她批評官員沒有同理心、沒設身處地考慮災民感受：「呢啲高官淨係坐喺冷氣房講呢啲咁嘅嘢⋯試吓佢有個屋企冇畀人燒到，然後幾個月冇得返屋企，睇吓佢可唔可以講得出呢句說話？」

父母罹難　宏昌閣蘇先生：三小時「一定唔夠」

八旬父母於宏昌閣高層單位罹難的蘇先生，指雙親遺體被燒過，單位「相信都未必有嘢淨」，三小時對他而言足夠，「可能要上去睇吓淨返啲咩、有咩攞得走」。但他指除了自己，有很多街坊的單位也沒有被燒過，被圍封多月、每個都很想返家取回有紀念價值物品，三小時「一定唔夠」：「我哋住咗40幾年，總有好多嘢喺入邊⋯將心比己，三個鐘夠做到啲乜嘢？⋯係咪真係要人哋放棄晒啲嘢呢？唔係囉，個單位業主係我哋居民。成日都講情理法，個情係無情定絕情呢？」

就卓永興的言論，他不滿說：「調返轉頭如果呢件不幸事情發生喺佢身上，有屋企人不幸過身，而又只有三個鐘頭畀佢執返有紀念價值嘅嘢，佢係咪真係覺得足夠？」「唔好成日話危險危險危險，坦白講，我哋當初投訴有危險，可能發生火警、棚網有問題、發泡膠有問題，我哋投訴過咁多次，你哋覺得冇危險吖嘛，結果咪咁大件事囉！如果你哋當初覺得有危險，就唔會發生呢件事。」他難掩憤怒。

受損較嚴重的單位只容兩人甚至一人上樓，蘇先生說，社工暫未通知其單位可有多少人上去，他指太太情緒較大、不太想她去，但自己一定會上去，打算找親戚陪同，「諗住攞啲花上去悼念吓囉⋯當係拜祭一下囉」。蘇先生坦言，未知自己情緒屆時如何，只能盡量控制住，「上就一定要上，始終我都係由細喺度大咁濟，始終回憶都係抹唔走，點都上去悼念一下囉，say 個 goodbye 又好，乜都好⋯」他不禁抽泣。

蘇先生與太太另居於宏志閣，就政府稱有複雜工程、需九個月時間處理，今年內完成機會甚微，他批評，認為工程已完成七成，原有升降機、水電煤等亦大致正常運作，仍需超過九個月才能返家不合理：「你講九個月，即係想背後目的係咩？係咪叫我哋走呢？叫你死心啦？」他又指，明白有街坊望出售業權，他尊重各人選擇，但希望與太太能盡快遷回宏志。

一家四口居於宏盛閣低層 16 年的蘇小姐，亦批評等了政府四個月，最終只換來 2,000 戶限一次上樓三小時的安排不周全，「我個單位都冇燒，點解只可以上去一次！」她獲社工通知可安排四人上樓，望與丈夫取回貴重物品，及兩個小朋友的相、公仔和被鋪，指平時有紀念價值的物品都「收埋咗」，需時找回執拾，同行朋友亦不會知如何擺放，「點可能三小時執哂？」

就卓永興稱不需太多時間告別，她反問「係咪講緊人話？」認為起碼要獲准上樓三次，「我唔介意佢分三次 15 日嚟安排，我哋都等咗四個月，呢段時間中門大開俾人偷嘢我哋都冇得反抗」。她又批業權未賣出，政府已規定只准居民上樓一次的做法令他們很不安。

街坊群組投票爭取多次上樓　至下午逾三成人贊成

災後回家心切，居民曾屢次組織聯署或投票，希望反映實際想法。住在宏新閣的鍾女士向《集誌社》表示，一個經居民核實身分、有逾 440 名街坊的 WhatsApp 群組，今早已就向政府爭取多次上樓作投票，以收集街坊意願，截至下午已有逾三成人贊成。與此同時，也有不少長者居民希望容許中途由其他親屬接力。鍾女士又透露，被告知其單位只限兩人入內，屆時警方、民安隊都會陪同上樓，社工則按情況陪同，是否意味上樓、入屋其實均可超過四人，她認為，如果政府人員不被劃在內，何不將減少人員配置，讓上樓人數，改為多一名家人陪同。

歡迎追蹤以下平台，即時接收《集誌社》最新資訊，及付費訂閱支持！
【付費訂閱《集誌社》】
https://thecollectivehk.com/subscribe/
【訂閱《集誌社》Youtube】
https://www.youtube.com/@thecollectivehk
【Like 《集誌社》IG】
https://www.instagram.com/the_collectivehk/