FI專欄｜第一次食印撈：一碗麵嘅溫暖｜人頭馬

作為90年代出世嘅港孩，我係典型「菲傭湊大」嘅產品。星期一到六，三餐有工人姐姐照顧得妥妥貼貼，點知一到星期日，畫風大變。老豆一早出門飲茶，媽媽捉緊機會補眠，我同妹妹唯有自力更生。

細個嘅我哋，廚藝未夠班，頂多係煮碗公仔麵，加隻蛋同條腸，仲要祈禱唔會燒燶個鍋。選擇唔多，麻油味出前一丁定辛辣麵，食到滾瓜爛熟。但作為一個小學生，搵到一餐搞掂自己，點都有種「我好掂」嘅滿足感。

去英國留學嗰陣，我仲係個公仔麵忠粉。行李箱除咗衫褲鞋襪，仲塞咗兩箱即食麵：一箱麻油出前一丁，一箱辛辣麵，簡直係我嘅生存命根。點知一到宿舍，先發現其他同學嘅「存貨」五花八門，有人帶台灣拌麵，有人藏日本拉麵，仲有個師兄拎出印尼撈麵，話係「留學生必備」。我當時仲暗笑：咁怪嘅名，點食呀？

直到某個夜晚，我同師兄在隔壁學校比完賽，返到學校已經餓到眼花，食堂又關門。師兄二話不說，翻出佢嘅「私人珍藏」，煮咗兩包印尼撈麵畀我。嗰一刻，香辣嘅調味醬汁一打開，混雜住蒜油同辣椒嘅氣味，簡直係天堂嘅味道！

第一啖入口，麵條爽彈，調味濃而不膩，仲有種莫名嘅溫暖，直搗心窩。後來我知，印撈嘅配方改咗好多次，嗰陣嘅味道真係獨一無二，食唔返。食完嗰碗麵，我同師兄吹水到半夜，佢仲同我講留學點樣捱過去，仿似畀我上咗一課人生。

多年後，我仲係印撈嘅忠粉，每次食都諗起嗰晚嘅宿舍、嗰碗麵同嗰份情。

留學教識我，人生唔係淨係搵食，仲有搵到屬於你嘅味道同溫暖。細個煮公仔麵嘅滿足感，已經好正；但一碗印撈畀我嘅，係回憶同人情味，仲重過一箱即食麵嘅份量。

Subscribe FORTUNE INSIGHT Telegram:
http://bit.ly/2M63TRO

Subscribe FORTUNE INSIGHT YouTube channel:
http://bit.ly/2FgJTen