娛圈單打︱拿督個女真惹火　扯煙斷正口水多

45歲嘅拿督女莊思敏向來係風頭躉，性格坦蕩蕩，唔止高調隆胸，仲高調閃婚再離婚，總之做乜都唔遮掩。嗱，日前Threads流傳一段莊思敏喺食肆疑似扯煙片，片中手持啡色煙仔，扯完一飛之後遞畀身邊男伴，一支煙仔多人輪流扯。

拍攝視頻嘅網民出貼，直斥「莊思敏and無品friends餐廳食雪茄，係咪當咗自己私竇呀自私X」，一石激起千重浪，唔止留言者眾，仲有「過來人」教訓樓主：「咪一見啡色就以為雪茄」，暗示並非煙仔咁簡單。

最終此貼引來本尊現身，莊思敏發文發相，將一名身處同一食肆嘅女孩子樣貌「冇碼直出」，仲話「我有個朋友仔想認識吓呢位靚女。Facebook大神可唔可以做個紅娘，有冇人識呀？」一睇就知意有所指。網民不值其所為，紛紛鬧爆佢其身不正，喺禁煙場所公然扯煙，仲好意思出相公審踢爆佢嘅人，搞到拿督女喺兩小時後急急刪除貼文。

喂，今次拿督女就唔抵爭啦，香港室內早就立法全面禁煙，至今已有20年，莊思敏除非身處外太空，否則冇可能唔知道。明明涉嫌觸犯法例，畀人影到疑似斷正，好嘅咪道個歉認吓衰，唔好嘅咪側側膊唔多覺，唔出聲當冇件事囉。反正網民都係善忘的，視頻好快就會石沉大海。

偏偏大小姐佢哪壺不開提哪壺，仲想搞公審，真係太睇得起自己嘅號召力啦。嗱，有指該食肆位處北角，有相有片之下，會否惹來執法部門跟進，真係要睇過至知。希望佢經一事長一智，做人唔使吓吓撐到行、贏到盡嘅，少說少錯，不說不錯，幾時都係冇錯！

東網網站 : https://on.cc/東網Facebook專頁 : https://www.facebook.com/onccnews/