「陳瀅2.0」柯雨霏表現出色　冼奕瑜台型十足

無綫全新歌唱大賽《聲秀》將於本周日（27日）首播，當中12位參賽者會率先露面輪流獻唱自選歌曲，並等候節目7名導師，包括蘇永康、譚耀文、劉浩龍、吳浩康、泳兒、鍾舒漫和胡鴻鈞挑選成為旗下學員。

打頭陣出場的是被視為大熱之一、有「陳瀅2.0」之稱的柯雨霏（Ophelia），由於其聲線與笑容均相當甜美，加上顏值高企，令泳兒及劉浩龍「爭崩頭」，兩人幾乎同步按下紅燈，最終更爭拗至「要睇片」決勝負，結果證實泳兒較快手！談到對Ophelia評價：泳兒表示：「佢聲線同樣成個package已經喺度。」劉浩龍則謂：「佢嘅優點就係隻眼識笑，呢個係一個好吸引嘅地方。」Ophelia事後表示由於自己十分喜歡泳兒的歌聲，所以對泳兒成為其導師大感興奮。

今集最吸睛的參賽者，則是因參加過《聲夢Junior》備受關注的冼奕瑜（Jasmine），Jasmine雖然只有17歲，但跳舞時舉手投足均充滿自信魅力，而且即使勁歌熱舞亦沒有影響歌唱表現，最終獲所有導師大讚，吳浩康說：「佢嗰個火喺隻眼裏面，一擰轉身未開口就已經存在。」鍾舒漫笑言自己「差啲撳爛盞燈」，並大讚Jasmine：「我覺得佢係full package，無論係樣貌身形、喺台上面嗰個魅力佢已經有，好吸引我。」

至於同樣被視為賽前熱門之一的「顏值擔當」胡子貝（Matt），來自江蘇的他雖然本身不太懂得講廣東話，但經過連月來苦練，唱起容祖兒的《心之科學》仍有板有眼，廣東話發音仍算過關，蘇永康大讚胡子貝「功底好」，並指對方是心水5強之1：「我聽到你個高音爆發位之後，我覺得廣東話應該唔係好大問題。」譚耀文：「覺得佢唔只係一個歌手，我覺得佢好有潛力、可以喺藝能界有好多方面發展，佢有明星風範。」

另外，獻唱《痛愛》的甄敏芳（Jenny）雖只獲兩位導師蘇永康及泳兒出燈，但仍獲得超高度評價。泳兒：「今日外型都有啲眼前一亮，開始有星味，身形又幾好。」蘇永康：「上次初選時你唱陳蕾嘅歌，我好深印象…我一直擺咗你喺五強入面。」期間還慈父上身：「你今日好緊張喎，阿女！」至於唱完後眼濕濕的Jenny，則坦言一直被父母否定的自己，希望能透過今次參賽令父母另眼相看：「如果你哋睇到，希望你哋可以認可我，為我驕傲啦。」

東網網站 : https://on.cc/東網Facebook專頁 : https://www.facebook.com/onccnews/