摩羯｜議員率先獲陳國基通知「上落波」時間被質疑　狄志遠相信對方想交代政府積極工作｜Ray Online

更新於 2024年09月06日04:50 • 發布於 2024年09月06日04:34

摩羯｜議員率先獲陳國基預早通知「上落波」時間被質疑　狄志遠相信對方想交代政府積極工作｜Ray Online

颱風襲港期間，市民都係要睇實天文台公布了解「上落波」安排。不過，原來政務司司長陳國基向議員短訊預告安排，仲快過天文台對外公布，被質疑做法係咪恰當。有份收到短訊嘅新思維立法會議員狄志遠相信對方係想交代政府積極工作，而唔係畀議員再對外發布訊息。

狄志遠今朝喺電台節目透露，噚日朝早未到10點收到陳國基私訊，話將會喺晏晝5點半至6點半改掛8號風球。比起市民得知嘅喺4點至7點掛8號波，縮窄咗個範圍。而喺今日，打工仔都要較定鬧鐘留意幾時會落波，方便即刻出門口返工。狄志遠就透露今朝都收到司長嘅訊息，對方交代颱風摩羯嘅風速較預期快，而吹襲香港期間有少數市民受傷，但已經出院冇大礙，更加預告會喺晏晝1點前落8號波。

摩羯颱風中環、紅磡、九龍塘港鐵站、紅磡海底隧道打風情況。（吳康琦攝）

摩羯颱風中環、紅磡、九龍塘港鐵站、紅磡海底隧道打風情況。（林俊源攝）

摩羯颱風中環、紅磡、九龍塘港鐵站、紅磡海底隧道打風情況。（蘇文傑攝）

摩羯颱風中環、紅磡、九龍塘港鐵站、紅磡海底隧道打風情況。（吳康琦攝）

早在今年5月紅雨已有此機制

電台節目主持聽到覺得好驚訝，反問做法係咪恰當。狄志遠回應話訊息好簡單，只係得幾十隻字，相信陳國基係想交代政府積極工作，用意唔係畀議員再對外發布訊息。狄志遠進一步透露早喺今年5月紅色暴雨導致西貢水浸嗰陣，已經有呢個「機制」，陳國基向議員發私訊，交代政府應對安排、部門分工等等。

原文刊登於 AM730

睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)

查看原始文章

am730

留言 39

4 哥
仲有規有矩嘅就唔係現今嘅香港啦，今日就提早通知天氣，當你習以為常囉，咁咪到啲乜嘢預算案呀，施乜鬼報告囉
2024年09月06日06:29
Elon Mars
人治係咁架啦！想幾點掛幾點落！天文台都話唔到事！
2024年09月06日07:14
J. Totoro
其實只係個預估時間，方便內部調動（特別係交通警、運輸署、醫管局）同公共交通預備... 以前都係會咁樣預估，只係姓狄嗰條友電台受訪嗰陣口齒不清。講到好似成個局咁
2024年09月06日07:08
ATO
即係個司長連天文台果份都撈埋。掛唔掛八號已經係睇人而唔係睇數據。香港真係越黎越跟跟規矩做野😏
2024年09月06日07:31
該留言因被檢舉已暫時隱藏