轉季係時候執衣櫃 五個方法幫你收拾得更有條理

依家天氣開始回暖，又係時候執下個衣櫃拎定春夏季衫出嚟，不過呢個「工程」相當浩大，因為平時實在買落太多衫喇～今日小編就想同大家分享下一啲收納小技巧，等大家可以更有效率同埋更慳空間地收拾衣櫃。

統一摺衫方法

摺衫嘅時候建議用同一個方法，咁就比較容易控制衣物嘅形狀，唔會一件厚啲，一件大嚿啲，搞到好難疊埋一齊又唔整齊，全部一樣摺法一樣，望落都去都比較順眼。

根據顏色分類

排列衣物嘅時候仲可以試下根據色調，將差唔多顏色嘅衣物擺埋一齊，當自己襯衫嘅時候都可以根據自己想著嘅色系揾衫，做到一目了然嘅效果，如果有好多衫嘅朋友分分鐘可以砌到一道彩虹出嚟添～

斷捨離

轉季都係時候檢視返有咩衫係一直冇著過或者係好少著，然後趁呢個機會處理咗佢，咁就可以騰出更多空間儲物之餘，都令衣櫃冇咁擠逼，容易揾衫好多㗎。

利用收納箱/盒

衣物都有好多種，除咗衫褲，仲有內衣、襪、飾物等等，利用收納箱/盒就能有效地分類唔同種類，亦都可以根據大小排列，揾起嘢上嚟都有效率好多。

利用真空袋

羽絨、大褸經常都好佔空間，但只要利用真空收納袋，將衣物擺入袋入面，再抽走空氣，成個體積就會細好多㗎喇，即刻擺多兩件衫都得呀！