【搵食CONY】留守家中慶祝母親節　與媽媽嘆high tea打卡

發布於 2020年05月05日10:58 • 搵食CONY

疫境下過母親節，一眾仔女或會心情矛盾，雖然限聚令放寬，但又唔想鬆懈出街慶祝，除了在家食外賣慶祝，有網上餅店就為大家準備另一慶祝方案，就係推出英式下午茶外賣，即使足不出戶，都可以同媽媽在家做貴婦打打卡，至於質素如何？等CONY為大家實試！

人氣網上餅店Valerie一向以蝴蝶酥及月餅為人熟悉，見近日大家都要留家抗疫，加上主理人有豐富的fine dining經驗，就諗到推出「Tea From Home」英式下午茶外賣，共9款美點，不但賣相精緻，而且份量比一般英式下午茶大份，所以店家都有溫馨提示，叫CONY記得唔好食lunch，以免食唔晒。

下午茶外賣以一個大紙盒盛載，附上伯爵茶及洋甘菊茶包。

每款美點都有小紙碟盛載，除了紙碟底部都有貼上膠紙痴實紙盒，點心的底部亦有塗上果蓉、忌廉式吉士來黏住紙碟，實行「雙重保護」，不怕運送時會容易翻倒影響賣相。

Tea From Home英式下午茶外賣。

首先不得不提英式下午茶中不可或缺的鬆餅，Valerie做得出色，不但入口鬆化，更充滿牛油香，塗上自家製的「玫瑰荔枝紅莓果醬」和「熱情果忌廉芝士」更添層次，荔枝的香甜與紅莓的酸勁互相平衡，CONY有時好驚玫瑰花香會太假，但呢款果醬只有淡淡的玫瑰幽香，在背後默默地提升水果甜味。

英式鬆餅（後）及抹茶曲奇（前）：鬆餅有兩款，一款原味，一款有提子乾，店家建議翻熱會更好食。至於曲奇係佢哋嘅名物，水準有保證。

鹹點方面，當然係以品牌主打的烘焙品為主。「雜菌茄子酥皮脆杯」香脆鬆化，內餡係法式茄子蓉配炒雜菌，口感層次豐富。品牌仲將泡芙作鹹食，相當特別，中間夾著滿滿的紅菜頭蓉，賣相吸睛之餘，味道清新宜人。最後當然有下午茶中必備嘅三文治「火箭菜巴馬火腿軟包」，雖然配搭冇乜特別，但勝在巴馬火腿用料好，油脂足夠，而且鹹香有致。

火箭菜巴馬火腿軟包（左）及雜菌茄子酥皮脆杯（右）

紅菜頭泡芙（前）及朱古力蛋糕（後）

之後來到品牌嘅拿手好戲──甜品！首推由內到外都充滿濃香宇治抹茶味的「宇治抹茶卷」，仲有微酸清新的「柚子慕絲」，超幼滑的慕絲與香脆餅底形成強烈對比。「朱古力蛋糕」帶榛子香甜，中間仲加入咗脆脆，食起來充滿層次。最後仲附上品牌最出名嘅抹茶曲奇和蝴蝶酥作結。

宇治抹茶卷（後）、蝴蝶酥（中）及柚子慕絲（前）

總括而言，去酒店食tea閒閒地每人都盛惠$300，但這套在家下午茶外賣只需$329（兩位用），如果唔要餐具更只需$299，還包括伯爵茶和洋甘菊茶包。或者你會話人哋係酒店，小店價錢平一截好正常，不過品牌主理人在高級餐飲的經驗豐富，出品的質素不下於酒店水準，尤其係英式下午茶中不可或缺的鬆餅和甜品做得相當出色，加上賣相精緻吸引，留喺屋企都可以打卡，絕對加分！

附上伯爵茶及洋甘菊茶包

溫馨提示，下午茶外賣推出咗幾個星期都反應熱烈，而今次母親節tea set將會係最後一輪，之後tea set會暫告一段落，想試的朋友記得把握機會啦。

VALERIE PASTRY Tea From Home
供應日期：5月9日及5月10日
供應時間：下午2時至4時半
價錢：兩位用$329（包即用餐具：碟、刀、叉、小匙、餐紙）、$299（不包餐具），包括伯爵茶或洋甘菊茶
詳情：Valérie Facebook